我真係冇脾氣

有一種人，佢地望落去冇咩脾氣，唔會同人爭執同嘈交，呢種人最鍾意做和事佬，萬事都以和為貴，咩都話「算啦！大家唔好嘈！」

你會覺得呢種人冇火，冇做人既腰骨，亦都冇做人應有既堅持。俾人恰到上頭殼頂都忍氣吞聲，就好似一條濕水炮仗，點極都唔會響。

好自然，你睇唔起呢種人，亦都好自然咁將佢地擺響一個不顯眼既位置，攞佢地黎開玩笑，點佢地做野，因為你知道呢一種人，就算將佢地搓圓撳扁，佢地都好似一舊海綿咁，將所有野都吸晒入去，唔會反彈。

但其實，你知道佢地心裡面諗緊既係乜？

你以為我真係冇火？我癲起上黎，連我自己都驚自己呀！

你知唔知我其實一直以黎，都壓抑著自己既心魔，我怕有朝一日控制唔到自己既脾氣，我會走出街去殺人！

你以為我好想做和事佬？你以為我真係俾人恰到上頭殼頂都唔出聲？

你地錯哂啦！

我好清楚自己既能力，一隻手指已經可以插盲你對眼，一條鎖匙可以割斷你條頸動脈，用力一扭，就可以扭斷你條頸椎。

我真係好怕大家講手既時候，我會唔小心而殺左人！

我唔係冇火，更加唔係因為懦弱，而唔敢去同人嘈。我只係覺得人生在世，訴諸暴力係冇好結果，我唔想被人傷害，更加唔想傷害人。

我明白忍一時風平浪靜，退一步海闊天空的道理！

我唔係冇脾氣，我只係唔發出黎！