殺狼有待

諸君做事太荒唐

無事狂踩理不當

飯民豬仔齊炒作

同心協力去誅狼

適逢德叔駕臨本城、話咗唔嫁又嫁嘅飯盟四人代表趁着出席酒會嘅機會、要求炒施威魷魚、以及重啟紫荊改革。之但係、施威是由阿爺欽點出來揸莊、絕對唔係呢班友話換就換咁簡單。講到重啟紫改就更加戇居、事關推倒紫改嘅係飯盟、現在喊重啟又係飯盟、彷彿當正阿爺廷係一部點唱機、呢班友喜歡點那首歌、阿爺就唱那首歌。咁你話嘞、阿爺算係老幾？其實成班友棟篤企喺度傾談廿卅分鐘、根本上傾唔出乜嘢名堂來、大概亦只能讓大家表示一下姿態而矣！坦白講、城中發生咁多事幹、若然話阿爺到咗今時今日才派人到來收料、咁即係話佢仍然未有打算、真係講出來都冇人信啦！係嘛？！

上一次小圈子擂台大賽備受冷落嘅抓錢華、今次忽然被人擺上台成為一枝獨秀嘅大熱門。聽講話、有投家要推薦他打小圈子擂台。但係從德叔講話之中暗藏不滿本城執法和司法部門太過怠慢之意看來、說明阿爺已經認定「港英茶葉」唔啱佢胃口。因此無論是抓錢華也好、葉柳也好、抑或係冧井也罷、全部都唔似係阿爺杯茶。於是乎、坊間又盛傳、素有「半杯紅茶」之稱嘅爭六成才是真命天子。但日前爭六成自爆、上次只係隨便講吓上擂台、就被人喝停、但係又唔准佢出聲、仲要佢霸住個位。佢仲話、有人不斷在其背大做文章、盡其詆毀和抹黑之能事。嘩、連啲咁機密嘅嘢都拎出來講、難怪有人話爭六成含沙射影、分明係唔想玩啦！然而、尚有一名在目前雖然未獲圈外人士注意、但在圈內人氣頗為旺盛嘅人物已經整裝待發。假如投家願意妥協嘅話、此人可以上位、而施威就會被升去做無兵司令。假如投家堅持要用「港英茶葉」去泡茶嘅話、那麼阿爺惟有讓施威冧莊。之但係、有人在江湖上吹風、如果老人家一意孤行嘅話、有人會將手中票投去給飯盟代表。嘩、你話萬一真係爆單咁嘅嘢出來、就確係反晒肚架喇！係嘛？！