點心

上茶樓一盅兩件(點心)是一般香港人喜愛的早餐及午餐。個人來說，我不大喜歡食廣東點心，可能因為營養師曾告知：廣東點心的油份和膽固醇偏高緣故，而且上茶樓食點心很多時會過量，較難控制體重。

以前要食廣東點心，當然要上茶樓，那管是舊式、還是新式的酒樓，除了要加一服務費之外，更要茶錢、茶芥錢....總之上得酒樓，唔食都要俾十幾廿蚊！

不過，近年香港經濟差，很多酒樓均在非繁忙時提j供優惠，計起上嚟，比較響羅湖商業城的酒樓還要便宜！不過，一分錢一分貨，依家好難食倒稱心滿意的點心質素。

近年興起一些點心專門店，細細間，以點心為主，當然亦有盅頭飯食。好處是冇加一，食幾多俾幾多，祇需俾三蚊茶錢(我幫趁過三間都是收三蚊茶錢)。可是，佢地祇有一款茶提供，冇得你揀！所以，如果為左嘆茶，便一定會失望。

早前，「哎呀大仔」約我去佐敦道「華饍」午餐：兩個人叫了一盅飯(忘了影相、甚至忘了是什麼飯，因為我冇飯癮嘅，阿仔自己食)、一客鳳爪、一客豬仔流沙飽、一籠蝦餃：

橫睇、掂睇、瞓響度睇都唔似豬樣、我仲拎張單嚟核對吓係咪自己攪錯、亦冇諗過係炸出嚟嘅！

 蝦餃，個樣同食味都算OK

鳳爪，不過不失啦！

以前響網誌度介紹過紅磡黃埔有間「百勝小廚」(是一街之隔「百勝酒樓」分鋪)，亦是以點心為主，開業之初我食過兩次都覺得唔錯。但正所謂創業難，守業更難！我其後再去過兩次，食物質素一次較一次差！早三個月「百勝酒樓」與此鋪均同時結業。

上星期聽聞在同一地點開了間「點點心」，朋友認為值得一試(下午茶時間全部食物七折，以入單時間計)，於是又因好奇心而光顧啦！

午餐時間，兩個人叫了「北菇雞飯」、「金沙肥豬仔(流沙包)」及「黑松露小籠包」：(埋單七十幾蚊)

北菇雞飯看似是去了皮的雞。賣相麻麻，食味算以啦！

三蚊一位茶錢。我飲左都唔知係咩嘢茶？侍應告知是普洱，之後再飲都係飲唔倒係普洱味，甚至可謂冇味！

呢個流沙包就真係成個豬樣啦(此店推介)！但係，大家睇唔睇倒有問題呀？

咁都得？

流唔流沙？我覺得係「流水」、「流油」囉！初出道果陣，流沙包真係食落有「沙」嘅感覺架！

黑松露小籠包(一客三粒，我又係食左一粒至醒起未拍照)，又係失敗之作！雖然面頭見倒一點看似是黑松露的物件，但食落完全冇黑松露嘅味道！

總括而言，我暫時對這些點心專門店都係冇咩嘢好感！