香格里拉「香宮」

尋日午間一時，天文台才改掛三號風球。我地幾個姊妹(當然唔係親架啦)一早約左去大學站愷悅酒店「沙田十八」午餐。前一晚，天文台預告晚上會改掛八號甚至更高風球，律師在群組講左：如果尋日朝早八號以下，便在尖東香格里拉酒店「香宮」午餐，如果仍是八號風球，便改在今天同地晚餐。

當時我心想，何解會改在市區食？因為除了我，其餘五位姊妹都住在東鐵沿線；我諗：可能佢地諗住淨係我冇揸車，就我掛！

尋日十點幾仲係八號風球，而且天文台亦預告八號風球會維持至午間，所以我咪將約會改左今晚晚飯囉！誰知律師來電，佢話反正中午都改掛三號，決定照食喎！

對我來說，冇所謂啦！我同「哎呀大仔」都試過八號風球北上操曲啦，有咩嘢問題啫？反而依家啲後生，又驚俾風吹落海、又驚落雨濕身會病....我地呢啲老骨頭，反而天不怕、地不怕....至驚冇得唱歌！死淨把口。

八號風球除左「打的」都冇車可乘。不過，你估「打的」就一定截倒車咩？我地約左十二點半，我十二點出門口，兩個可能：十二點十分到達、或者遲到，視乎搵唔搵倒的士搭囉！都唔係咁順利，行左幾條街至載倒的士，我諗住最壞打算係行路去，半個小時一定可以到達！

L總監接載其他三位姊妹，從錦繡花園出發；律師住大圍，佢有車我唔駛擔心。

十二時四十分全人類到達。我問律師：何解改響尖沙咀？(心裡面原本有答案架)

律師：因為Y校長覺得「沙田十八」啲餸越來越咸，所以改嚟呢度。(哼！居然係呢個原因。)

我：我仲以為你地咁照顧我添！我真係唔應該以自己之心度你地之心嘅。(其實尖東都唔算就我架！好吊腳：行去又遠、搭車去？除左的士，又冇車可乘！不過，如果唔改地方，我一定唔去，那時未有火車，山長水遠打的去食午飯？真係唔好客氣----我一向唔食午餐架！)

我地六個人叫左個點心套餐：(續位計)

菊花杞子茶：茶味冇咩嘢特別，特別在果個米通瓷杯，晶瑩剔透。

點心：素餃、蝦餃、菠蘿叉燒包----點心做得精緻，好好味！

因為律師喜歡食雞，呢個餐冇，所以我地加左半隻「欖角焗炸子雞」，因此每位送一杯鮮搾果汁(半隻雞又唔記得拍照，算啦！反正佢唔屬於呢個餐)

呢個湯我唔知咩嘢名：似係灌湯餃，加左金蟲草同花膠。料好足！不過「珍妮校長」響隔離輕聲講：啲湯咸左啲！ 我答：係！

律師聽唔倒，佢：啲湯好甜！

所以口味嘅嘢....我：你所講嘅甜，即係我地所講嘅咸！

蘆筍炒鮮百合帶子：有水準！

右面嘅係「百花釀冬菇」，左面嘅係加左調味嘅「玉子豆腐」，味調較得唔錯！

登、登、登、登！貴嘢出場啦：鮑魚珍珠雞。隻鮑魚唔細，又稔又滑！反而珍珠雞我覺得咸左少少。

呢個餐連甜品：芒果布甸。除左我，佢地改左食杏仁露。

其實呢個餐份量好足，根本唔駛加果半邊雞！不過，喜歡食咪叫囉，何必難為自己？又唔係餐餐咁食！

總括嚟講，呢餐都幾合意！因為一點改掛三號風球，L總監下午要返工；律師乃自由人，佢話打電話番寫字樓睇吓有冇人返工先，如果冇人返、佢返，其他人就有壓力，咁就唔好啦！

食完餐飯經已改掛三號風球(那時是兩點半)，我叫佢地唔駛理我，我自己搭幾個站巴士返屋企便是。