垃圾會論壇

首先向大家致歉，因為我曾經講過唔會再睇港台製作嘅節目，尋晚電視七點幾果段時間真係冇嘢好睇，即使係個垃圾台製作嘅垃圾節目都焗住睇左幾十分鐘，才可以轉台。

不過，唔睇尤自可，一睇把鬼火！尋晚咁啱係「九龍東」論壇。「候選人論壇」呢樣嘢係自有區議會選舉以來便有舉辦嘅，當年攪呢樣嘢我都有份做蠶蟲架；因為第一次攪選舉，候選人響區內冇咩嘢人認識，希望透過公開論壇令選民對候選人嘅談吐、抱負、性格增加認識，從而作出正確選擇。

當年嘅候選人論壇，我覺得某程度上的確達到以上目的。但係，時勢變左、人嘅質素變左、選民嘅質素亦變左，呢啲論壇其實真的有如雞肋：食之無味、棄之可惜！等如「垃圾會」咁之馬---點會諗到依家啲選民鍾意睇掟杯、掟碟、抬棺材、拉布之類嘅場面啫！有咁嘅觀眾，先會選出咁嘅質素嘅「議棍」啫！

觀乎「九龍東」嘅候選人質素：正如果位由頭到尾都係黑社會大佬形象果位話齋：「點解依家啲候選人質素咁差」(大概係咁講)？」

哈哈！咪因為有佢囉！

嘩！以前果啲論壇，候選人固之然會互相質詢，但係一樣以禮相待；曾幾何時，有候選人可以響論壇度公然用粗口鬧人？質素低、唔係因為佢咩？不過，太冇火花又冇嘢好睇嘅！不過，正如我經常講果句：「鬧人唔一定要講粗口」啫。

還有某候選人公然在論壇支持「港毒」？有冇部門會跟進？全港市民可以做證喎！

「民主黨」講來講去都叫人答佢支唔支持查CY，但係人地反映問佢支唔支持調查收受「黑金」嘅黨員，佢又唔答。我支持一切正義、尋找真相的行動----包括查CY、查「黑金」、查法官有冇偏幫.................

依家啲論壇衰過去街市買餸，製造噪音！自問聲唔夠人大，千其唔好參選！否則你有你講、人家有人家用把聲蓋過你講嘅嘢，冇番咁上下定力，好容易唔記得自己講緊咩嘢！講起呢樣嘢我又要俾個like阿「李思傿」喎---佢可以自己有自己講，唔受隔離左右騷擾！我唔係佢個選區，我冇票可以投俾佢架。我亦唔係「九龍東」選民，真係執番身彩！

講真吖！我依家都未諗定投唔投票。咁嘅質素，唉...唉...唉！

祇要打果把唔係「黃傘」，就得架啦！