雙椒炒一口和牛
2016/09/01 15:26:39 網誌分類: 食譜
近年香港充斥戾氣,有咩嘢好得過化悲憤為食量吖!尤其是呢味係唔須要廚藝,「0」失敗嘅餸!
「哎呀大仔」早幾日去高山睇日場大戲,散場約我晚飯。飯後佢話要去附近間凍肉店買「一口和牛」,佢話之前買過,啲孫讚好好食!我住響呢區今年剛滿廿周年,正所謂識途老馬,咪帶佢去囉!佢買過一次,但係都唔係幾認得條路。
嘩!佢買成十包(正一係大戶),我咪搭單買兩包試吓囉!結果阿仔冇收我錢,當係孝敬「阿媽」喎,算佢有啲孝心啦。
店主千叮萬囑:唔好醃、唔好落油。
我地啲老人家,驚住唔記得,第二日「拿拿林」煮一次---煮過一次就會入腦架啦。
呢味係不中不西嘅煮法。鬼叫我早一日買左兩隻青黃椒,因為阿仔臨時約我晚飯,所以冇煮到;咁咪煮個「雙椒炒和牛」囉!點解唔買三色椒?一次食唔晒,唔想剩番,變左餐餐都要接「椒」!
難怪阿仔話每次要用三包!一包200克(依家八折,$36一包),得十六粒肉,一個人份量差不多,啱我囉!不過,又真係好好食喎!
材料:
一口和牛200克
青、黃椒各一切件
葱段(可有可冇)
蒜茸
汁料:蠔油、生抽、糖、生粉、水
一. 先燒油爆青、黃椒,下少許鹽及水煮至自己喜愛的爽度。
二. 白鑊放下牛肉粒,煎完一面轉另一面;反轉後加入蒜茸至三面煎好,加入青、黃椒,葱段及汁料,煮滾兜勻即可。
噁突!
一包得十五粒咋。我買左四次,一共四十包,我只食得幾粒。成班孫話好食,食完叫我再買。我今次真是捉蟲,只好當獲利回吐啦。