CSL今時今日,咁嘅服務態度...

2016/09/30 08:17:43 網誌分類: 生活
30 Sep

尋日上課,我部手機成朝都上唔倒網,連whatsapp都睇唔倒。每次企圖上網,屏幕便顯示「手機網絡連接不穩」,叫我再試....試左N咁多次啦....

我嘅手機服務計劃,數據用量有限制(窮吖馬),但通常我都夠用;如果咁啱果個月用得多,用到70%電訊公司會以短訊通知我。選擇一:盡量出街、去嘅地方又冇wifi嘅咪唔上網囉;選擇二:加錢買數據囉!

如果通知果陣仲有幾日便是截數日,我通常會慳住駛;但係如果仲有十日八日,我便俾$28增加數據用量。

還有三天便是截數日,我冇收過電訊公司通知,但因為成朝都上唔倒網,下午回家後,用屋企wifi上網又冇問題,所以我第一時間會諗:係咪我啲數據用完?但係理論上,電訊公司未試過用完即停止,而冇事先通知!

傍晚落去CSL門市查訊,接待我的是位仁兄。我問:「我部機響街外上唔倒網,會唔會係數據用完?」

果位仁兄問我攞左個手機號碼,跟住一路對住部電腦粒聲唔出,唔知做咩?隔一段時間,佢俾番部機我,亦係二話不說!我問:「得架啦?」佢點頭示意(如果唔係佢問過我攞手機號碼,我真係懷疑佢係啞架)。

攞番部手機,未離開前,梗係檢查吓先。咦!同未整之前一樣喎。

我同果位仁兄講:「一樣上唔倒網喎!」

佢於是問我攞身份證睇(依家先有懷疑),跟住又係對住部電腦攪機。隔一會,佢拆開我部手機底板,拎左張sim咭俾我(一樣冇講嘢),我假設係我張sim咭壞左啦!我見佢同我換左張sim咭,跟住俾番部機我,告知:「我同你換左張sim咭。」噢!我唔係盲嘅,我見倒!

跟住佢細細聲同我講:「我地公司之後會打電話俾你評分架!你俾高啲分吖,我地最少要?分至及格架。」我心諗:吓?咁嘅服務態度仲好意思叫我俾高啲分你?

今次攞番部機,梗係要再次檢查啦;哼!又係一樣喎。

果位仁兄拎番部機同我講:「你部手機有問題!」

我:「我響屋企冇問題,咁應該唔關部機事喎!」我本身係電器白痴,但凡電器用品出左問題,我都好苦惱!

仁兄:(又拆開部機,我部機係雙咭嘅,不過我祇用一咭)「你插咭嘅位鬆左。」佢跟住將我張咭插入另一面「依家得啦!」

我:「真唔係呀!」試吓,真係冇問題喎。

問題嚟啦:

一. 如果佢一早知我部機插sim咭個位鬆左,何解佢要幫我換過張sim咭?

二. 如果佢明知係呢個問題,何解一開始唔幫我插過另一個咭位?抑或佢認為呢個動作應該由個客自己做?即使係咁,佢都要話俾我知、我先知要咁做架!

同一間分店,我上次續約時都出現左問題,期後與朋友傾開計才知道我俾接待我果位店員欺騙了;不過,後來電訊公司致電叫我評分,我都冇投訴佢不是!

自問唔係一個吹毛度疵嘅人(唱曲除外),果位仁兄咁嘅服務態度,好似王祖藍話齋:我真係接受唔倒囉!

其實身為電訊公司職員,如果有顧客走嚟話俾你聽,部手機上唔倒網,你整好後一定會自己檢查吓,上倒網先至俾番個客架!冇理由一而再、再而三咁要個客自己去重覆檢查架。

下次服務計劃到期,我考慮唔再續約、又或者手機再有問題,搭車去第二間分店----希望唔係天下烏鴉啦!

 

 

回應 (2)
我要發表
VanYYY
VanYYY 2016/09/30 11:56:07 回覆

今早同姪女食早餐,講起呢件事,佢都覺得果位仁兄好離譜,仲好意思叫我評高分。果位仁兄唔算係年輕人,我諗佢卅出頭!依家呢啲職位會唔會好似清潔阿姊咁,好難請人呢?不過算啦,第日佢地果一代個個都係咁,香港話事人都唔好得去邊:到時阿蘭嫁阿瑞,就唔會有代溝嘅問題架啦!係我地呢啲老嘢先睇佢地唔順啫!

383383
383383 2016/09/30 11:36:51 回覆

{#iconb_268}

而家那些細路做野,係咁上下的了。

君不見,大學生抗議的橫額,字肉酸都唔止,竟然唔夠位寫都夠膽死?

寫之前,無度下位,分好距離的嗎?

中學時做壁報,都是老師落手做,回家做"波直",全部由父母做?

user

最新回應

立 冬
立 冬 2018/06/13

新版都有好處的, 至少用手機來睇會較以前方便.  你休息夠了再回來啦!   {#iconb_21}

VanYYY
VanYYY 2018/05/24
@域 流亦詩...

雖然我封舉,有空仍會拜讀你的大作!

KING.
KING. 2018/05/19

都要改啦, 以前頭條blog都唔係mobile reponsive web. 而家改左,你有冇發覺冇以前咁棘.

域 流亦詩
域 流亦詩 2018/05/18

祝你身體健康、愉快。它朝有機會再在博海相見!