律政強人

「無線」果套「為食神探」草草播完，取而代之的是「律政強人」。姪女問：果套「為食神探」咁快播完？係咪腰斬架？

據我知，應該唔係腰斬嘅，但係套劇似係用嚟攝檔期多啲---起用冇演技嘅「翠如BB」、阮兆祥扮相猥瑣、小生馬明成個丑角咁，早收早著啦！

睇劇最緊要係頭果兩集，如果製造倒先聲奪人效果，觀眾便有興趣睇落去。姪女回港那晚做緊第七集，我地都覺得李佳芯係有線過檔嘅藝員中可塑性較高、亦較有演技的一位，其他....好似「數字男生」咁，唉！唔該佢唔好做幕前啦。

個人嚟講，我比較喜歡睇以律師同警匪作主題嘅劇，因為同我有關囉！高登仔指呢套劇有抄襲之嫌，不過抄唔緊要，最緊要識抄啫！依家啲粵曲咪一樣係你抄我、我抄你，咪睇吓邊個鋪排得首曲靚啲囉！

姪女慨嘆：「無線」咁多藝員，點解要搵埋「陳？琳」、「蔡？？」、「翠？？」呢啲演技欠奉嘅人拍劇？

好簡單啫，貪平囉！有好多人係以貌取人架馬。不過，佢地都算有貌咩？嘩，遲啲搵埋「粗口港姐」、「自封特首港姐」拍劇又有咩嘢奇？佢地老豆大把，唔駛錢都肯拍！

姪女再問：有好多藝員演技好好，點解唔搵？

更簡單啦！唔係自己友囉。你睇吓「數字先生」果個款，「無線」一樣安排工作俾佢，話之佢響個節目係可有可無、甚至有點阻掟！

莫講係「無線」咁大嘅機構，任何機構用人為親都......

嘘！講番套新劇。廖啟智同方中信都係外援，更係有實力啦。李佳芯響套劇暫時俾人感覺係一無是處---好似佢老豆劉丹話齋：如果間律師樓唔係你老豆我開嘅，你都幾難響度立足。

不過，我相信往後嘅發展應該係佢因為家庭環境變遷而改變，變成一位強勢律師！呢樣係我估嘅啫，如果唔係咁，個劇本可以點寫落去？

睇左七集，惟一感覺係：職場如戰場！辦公室政治無可避免，但係如果成個寫字樓都冇一個人可信，我寧願轉職囉！槍口唔係應該對外嘅咩？你接左單個案，隔離個同事(仲係上司)惟恐你打贏場官司，千方百計要攪破壞(唔單只佢一個喎！要夾埋其他人攪破壞)，咁辛苦為咩？對住啲咁嘅人，真係揾倒錢都冇命享，你做埋我份咯！