現代「友情」故事

早兩晚同姪女打邊爐。我問：「你好似尋晚剛與朋友打邊爐，今晚又打？」打邊爐係佢提議嘅。

不過，我隨即補充：「你響上海工作時，差不多一星期打足七晚；連續兩晚打邊爐濕濕碎啫！尋晚幾多人？」

姪女：「有成十個人架！尋晚食脆肉鯇魚..」

我：「脆肉鯇魚唔好食！」

姪女：「係囉！得個硬字。食食吓有位女性朋友給魚骨插入牙肉...」

我：「掹番出嚟咪得囉！亦唔關食肆事，係佢自己唔小心啫。」如果佢俾留在魚咀嘅魚鈎(舉例啫)整傷，咁又唔同！

姪女：「掹唔倒呀！佢要去「養和醫院」，去到才發覺冇醫生(咁奇)，又再去「東區醫院」急症室至攪得掂！」

我：「你陪佢去？」

姪女：「冇呀，我地都冇去，佢自己去咋！」

我：「吓！你地咁都得！」

姪女：「我尋晚返嚟(我瞓左)諗吓諗吓，都覺得有啲問題...」

我：「你果啲係咩嘢朋友？你中學同學？」姪女響香港讀到中四才移民美國。

姪女：「唔係！我地大家咁啱響唔同時間，在上海同一機構工作。」佢地全部都已回港。

我：「哦！咁即係舊同事啫。如果當對方係朋友，我唔會咁做囉！如果冇其他人主動陪佢，我一定會！點可以由得一位受左傷嘅朋友咁無助架？」咁即係大家都冇當對方係「朋友」！

姪女：「其中有位仲有揸車添！」咁大家認為呢？

在以下情況，我可能有唔同諗法：

一. 當事人堅持自己攪掂！有咁嘅人架。

二. 當晚得三個人食飯！叫左嘢食，剛開始便出事---如果一位要去急症室，另一位又要陪佢去急症室，剩下果位要獨食：咁都好慘啫！要不，一齊埋單送佢去。我相信可以同食肆講，未上桌的食物扣除；如果我係果間食肆話事人，我都落於咁做，講到尾個客都係響自己地方出事！

姪女表示：「當時真係冇人諗過要陪果位「朋友」去醫院！」

我心諗：果啲咩嘢人嚟？「港女」？永遠唔會替人家著想？

如果響街度見倒有人暈低、唔舒服....即使唔識嘅都應該伸出援手啦，何況係識嘅？想當年某早，我返到寫字樓附近，見一「迷幻嬌娃」瞓左響酒樓外，我都會叫救護車，陪到車嚟、睇住佢上左車至返回寫字樓。一個女人不醒人事瞓響街，咩嘢事都可以發生架馬！

係時候要教吓姪女：「你事後諗倒有問題，都仲有少少良心；但係將人比己，如果當時出事果個係你，你是否樂意見倒咁嘅處理方法？」

人的一生，有能力幫人、總較要人幫來得幸福！