本末倒置

2016/10/17 08:13:46 網誌分類: 生活
17 Oct

姪女今次回港,斷斷續續住左響我屋企個幾月,中間有約兩個星期去左日本旅行。早兩日美國的姪仔(佢細佬)經港到中國不同城市公幹,留港祇四日時間,昨晚兩姊弟差不多時間要到機場,姪女回美、姪仔飛杭州,跟著的日子,佢有佢地生活,我有我的忙碌!佢兩姊弟雖然都係住響美國加州,但相隔頗遠,車程來回都要一日。

舊老板早兩個月俾電話我,問我依家忙咩嘢?我答:「無事忙囉!」但係你要我答忙咩嘢?我真係答唔倒!祇是姪女今次住響我屋企咁耐,佢都覺得我好忙,咁即係我真係有嘢做,唔係得個講字啦!

姪仔雖然在港四天,我地都係上星期六才見面,因為一早約左去拜山。中午響黃埔飲茶,之後帶佢地去柴灣拜山。今年我總共去左三次,第一次係清明,第二次係帶姪女去,今次係帶姪仔去-----姪仔記憶中,佢都超過十年冇回港拜山!

尋日佢地傍晚上機,中午我地響黃埔海逸酒店The Promenade食自助餐,食得太飽,結果我連晚飯都冇食!

食完午餐返家時,姪女問我:「後面果個係咪「禎子」?」心諗:日光日白,咁猛?

回頭望望,見一名直髮、著住熱褲的女子,睇落有點似,不過好彩唔係!否則要買籮柚葉洗眼。

我:「有啲似,不過唔係!「禎子」對腳肥好多。」

姪女:「死啦!如果我係佢,真係要整容先得,容咩嘢易俾人打架。」

我:「算啦!呢個世界好多厚顏無恥嘅人嘅。」

姪女曾向我表示,有意思響美國開間咖啡店,因為佢好鍾意飲咖啡。今次回港,佢仲報左班上堂學拉花,星期五晚上左課,此乃姪女製成品(最下面果杯):

佢問我佢拉片樹葉得唔得?我答:「如果係樹葉,就唔得囉!有部份似隻蝴蝶。當然,同左手面果杯比較,又唔太差。」

因為佢好早同我講呢件事,所以早幾日我地專登去間咖啡店食午餐,等佢學吓嘢:(顧客有權要求不同造型)

{#14523019_10154690814239124_3128937037229138245_n[1].jpg}呢隻係貓,下面隻係熊

{#14606275_10154690814364124_477764326937749287_n[1].jpg}我最欣賞係呢隻龍貓造型。

但係姪女上完堂後,佢話拉花講手力。拉樹葉係要一筆過做出嚟,反而龍貓較容易,畫出嚟!我唔知真唔真。

不過,當日兩杯飲品上桌時間相距成三十分鐘;嚟到杯飲品經已唔係幾熱---究竟我地係欣賞杯咖啡嘅味道、定係貪睇拉花嘅造型呢?

姪女仲話回美後要報名考牌做咖啡師。姪仔問:「你學嚟做咩?搵份兼職消磨時間?」

姪女:「係呀!仲要返工時間任擇果種。」係咪人到無求呢?

回應 (0)
我要發表
user

最新回應

立 冬
立 冬 2018/06/13

新版都有好處的, 至少用手機來睇會較以前方便.  你休息夠了再回來啦!   {#iconb_21}

VanYYY
VanYYY 2018/05/24
@域 流亦詩...

雖然我封舉,有空仍會拜讀你的大作!

KING.
KING. 2018/05/19

都要改啦, 以前頭條blog都唔係mobile reponsive web. 而家改左,你有冇發覺冇以前咁棘.

域 流亦詩
域 流亦詩 2018/05/18

祝你身體健康、愉快。它朝有機會再在博海相見!