明哥籌飯票 蘭桂坊限定店義賣
2016/11/17 10:11:04 網誌分類: 生活
深水埗明哥(陳灼明)喺深水埗派飯畀基層市民,善行全港都like,Kelly知道明哥有心做得更多,由佢發起嘅「北河(明哥)慈善基金」正式成立,今日起喺蘭桂坊設立慈善義賣限定店,義賣飯盒及慈善飯票,打算籌募四萬張飯票經費,幫助基層市民解決溫飽問題,中環人,請行動起來,支持明哥! 今次「北河同行.蘭桂坊慈善義賣限定店」義賣活動,由今日起至十二月十五日嘅一個月內舉行,將義賣九款由明哥親自特選嘅小菜飯盒,例如有粟米班腩飯、鮮茄肉片飯、乾炒牛河等等,小妹見到流晒口水,義賣目標係籌募足夠一年所派發嘅四萬張飯票經費。 明哥話,只要大家幫手每買一張飯票,就可以讓一位基層市民免費享用一餐膳食,另外仲有多種方法支持,例如可以喺香港全線7-Eleven及Deliveroo美食外賣服務等購買慈善飯票,而用AndroidPay手機服務付款,AndroidPay會額外捐多4蚊畀「北河(明哥)慈善基金」,推高善款。連食評家蔡瀾都話活動好有意義,出面相助,親手為九款小菜飯盒揮筆題字。 KellyChu |
| |
|
回應 (0)
我要發表