是公幹、抑是私訪？

報載：

被指會「衝燈」參選特首的財政司司長曾俊華辭職至今十五日，仍未獲中央批准。曾俊華昨於財政司司長官邸一直未有外出，他於社交網站發表網誌忽然力撐社企，形容社企如扮演政策實驗室的角色，讓一些新意念能夠得到測試，再由政府吸納，他認為政府有責任為他們的工作提供支援，拆牆鬆綁。

兩日未外出 僅發表網誌

曾俊華連續兩日未有外出，昨於社交網站發表網誌，自爆上周五曾到深水埗探訪社企、接觸部分商戶，提及要為社會帶來改變，很多時候要由一些「傻傻哋」的意念開始，將一些看似不可能的事變成可能，而一代又一代的「傻人」前仆後繼，推動社會一直向前發展。他又稱，明白政府對社會不同問題責無旁貸，感激有心人補救政府工作不足。(辭左職，雖然未獲接納；據講佢辭職當日經已開始放假，咁今次就唔應該係公幹啦！如果係私訪、而佢跟住又參選，咁今次活動駛費係咪要計入選舉經費？當中有冇公職人員參與(包括座架、司機、汽油)？有的話，即係公器私用，又如何處理？)

曾俊華於本月十二日辭職，隨即展開休假，直至昨日剛好半個月，仍未獲中央批准。翻查資料顯示，上屆特首選舉，時任政務司司長唐英年同樣為參選而辭職，中央於事隔兩日批准其辭職。

------------------------------------------------

講開又講吖，雖然我唔認同「曾」係特首理想人選(又關我事？我都冇得投票！)，不過，我覺得現有安排好有問題，對佢唔公道。

雖然我一早講中央可以駛出一招「不接納辭職」令「胡鬚」冇得參選、或者很遲才接納令佢冇足夠時間進行選舉工程(佢都懶理你反對，做緊啦)，但係呢個安排對公職人員好唔公道！如果幾位司長都有意參選，中央淨係接納某人辭職而唔俾另一啲人辭職，咁即係迫選委接納某一個人啫！咁樣做我相信市民會有好大回響。

我唔清楚司長級辭職情況。響香港，單方面要離婚都可以啦，祇係時間問題啫！補錢得唔得？如果補錢得嘅，我諗「黑金」金主好樂意「造王」；六個月、甚至一年通知期又得唔得？如果可以用通知期解決，第日有心人士咪早半年或者一年辭職囉！如果三位司長都有意嘅，到時佢地集體辭職，咁咪學依家咁逢官升一級(署任)囉！咁樣做對整個政府運作都好有問題---會俾社會一個訊息：呢幾位司長係可有可無、隨時可以搵人代替倒嘅！咁我地因咩嘢用咁高人工請佢地？