人怕出名豬怕肥

無線的「阿爺廚房」，令一直是武師的鼎爺爆紅，原來佢不單祇功夫了得，煮食功夫亦有番咁上下。雖然佢講嘅嘢，我唔係百份百認同，但係今次呢輯飲食節目又真係令人眼前一亮----飲食節目主持人唔駛靠靚，煮得就OK架啦！亦唔一定有搵個拍檔，要搵就搵個都煮得吓嘅，唔好搵個樣衰又唔識得煮嘅，對個節目有害無益！

一個人唔出名冇人理，鼎爺今次一舉成名市民知，自然有「狗仔隊」去摷料。剛出爐嘅周刊爆佢經已與一名年約六十歲的女士結婚，但鼎爺今日祇承認有要好知己女友，卻否認再婚！不過，無論佢有否再婚，又與人何由呢？除非佢同施明未正式離婚啫！

做得公眾人物，正所謂食得咸魚抵得渴，俾人揭私隱無可避免。正如宣佈左參與行政長官選舉嘅葉劉淑儀話齋：「希望各位傳媒朋友手下留情 ， 你可以攻擊一個政治人物，但要放過他們的家人(她的女兒)。」 佢咁講啫，依家嘅傳媒質素？同佢地講有用咩？唉！

做得公眾人物背後嘅女人(男人都一樣啫)，就要識得做人！如果一日到黑俾人見倒你成個潑婦(有冇潑夫嘅呢)咁，對丈夫一定有影響！所以，成為公眾人物背後嘅女人同屋企人，言行真係要小心，幫佢唔倒、都唔好幫倒忙！唔出得廳堂嘅，咪留番屋企做backup囉(我就煲多啲靚湯佢飲，佢唔駛慌，哈哈)，出少句聲冇人話你啞嘅！

所以，如果心知自己另一半或者屋企人係好有問題嘅，千萬別做公眾人物，留番啲時間陪佢地同搵真銀好過啦！