圓一個咖啡夢
香港寸金尺土，如果無資金雄厚嘅後台撐住，想開間舖做自己想做嘅事，一啲都唔容易！
「80後」咖啡師Chris，自從讀大學嗰陣，已經朝住開精品咖啡店嘅夢想進發，就算世界幾現實都好，都會諗辦法做好佢。
佢大學畢業後，做咗兩年文職工作收入，生活穩定，但刻板嘅工作，令佢開始反思自己到底想要點樣嘅生活，向來鍾意飲咖啡嘅佢，眼見香港被集團式咖啡店壟斷，即使有精品咖啡店，亦唔似得南韓或者台灣咁，開到一街都係，點解香港唔得？
自此Chris日思夜想，腦海不斷浮現關於咖啡嘅問題，終於，佢決定毅然放棄香港嘅一切，遠赴韓國學習咖啡烘焙沖調技術，以及當地咖啡文化成功的原因。
由於韓文唔算流利，難以同當地人溝通，成為首要難關。好彩喺韓國打工嗰間Coffee Shop嘅老闆娘，好熱心幫忙，不但無嫌棄佢韓文唔叻，仲好肯教佢，成日提醒佢唔好盲目追逐潮流，永遠要記住初衷，努力完成目標。
由乜都唔識，到慢慢掌握到點樣沖調一杯優質嘅精品咖啡，過程中經過不斷重覆又重覆的失敗再嘗試。起初Chris未掌握到拉花竅門，唯有將勤補拙，返工嗰陣不停練習不特止，有時放工都留喺鋪頭繼續拉。
唔知係太心急定係太攰，試過幾次拉拉吓花，拉到手震要停工休息，當時真係好難受，令佢懷疑自己嘅能力。慶幸咖啡店嘅同事會互相扶持，充滿正能量嘅工作環境，令佢慢慢忘記失敗帶來嘅失望，反而更加珍惜每個學習嘅機會。
回港後，Chris同家人合資開設咖啡店，深深明白到「創業難，守業更難」，要做到收支平衡，令佢好大壓力，偶然遇上生意唔好，就會有來自四方八面嘅意見「你咁做唔得架」、「不如加啲乜乜物啦」。
Chris開頭都有掙扎過，考慮為救生意，去改變店舖風格或營運模式，但後來反思自己為乜要開咖啡店，佢唔係為咗要搵好多好多錢，如果為搵錢，佢唔需要開咖啡店，大可以做返之前份工，得閒去飲杯咖啡就算， 點解要離開一份穩定嘅工作去冒險？ 原因好簡單，就係因為好鍾意咖啡。
就算世界幾現實都好、有咩困難都好，都要勿忘初衷，唔使要求自己可以改變世界，但唔好畀世界改變自己。
要keep住那團火，要繼續圓一個咖啡夢！
