2018：新一年，新目標

2018年第一日，祝大家元旦快樂，香港繁盛寧靜。

學「阮」(中樂樂器一種)學左大大話話三年，並無寸進。原因係：個人始終喜歡唱歌多過玩音樂！大部份時間都用左響研究歌藝度，實在唔想花時間練習樂器，依家祇係每週上課果一個小時先玩吓件樂器，有進步至奇！雖然老師多次叫我上埋練習局，但係一上便要四個小時，我腰骨痛，唔坐得咁耐，又唔係等住以玩音樂搵食，何必攪到咁辛苦；老師叫左幾次、見我冇反應都放棄咯。唱歌又冇問題喎，因為係企響度唱吖馬。

月前「雲師叔」致電，問我28號下午有冇時間？因為我師父響西環長者中心教授粵曲，28號會響中心攪個「騷」，讓學員有機會現場表演。我會錯意，問：「吓！唱歌？邊個同我唱？」

師叔：「唔係唱呀，你學左「阮」咁耐，搵你玩阮呀。」

我：「吓！咁大件事？我未正式夾過band喎！我驚玩死啲學生喎。」

師叔：「你學左咁耐，係時候踏出第一步啦。」結果咪硬著頭皮---上囉！

好彩！原來師父搵左啲正式音樂師父(基本上都係我地華山派(馮華徒弟/徒孫)同門)，我係搭單嘅啫，咁都冇咁驚。頭架(team leader)係「保哥哥」，呢個名係我「安」嘅，不過其後所有人都跟我咁叫，佢本人又好受落喎。

保哥哥從內地來港定居約十年，為人不苟言笑(幾似我喎)；過往見佢都係師公生前約我練曲、搵佢玩二胡傍住我唱；除左大伙人飲茶/食飯之外，真係冇咩兩句。後來師公健康情況轉差，冇幫我操練，所以我與保哥哥真係好耐冇見。不過佢來港之後，一直是我師父上課的御用樂師。

我呢個「南郭女士」(註)，難得「保哥哥」咁好招呼---自動幫我個阮調音，又幫我搬埋椅坐響佢隔離----嘩！好大壓力呀：我玩錯佢一定聽倒！呢個都唔係最大問題--我唔希望因為我出錯而影響大局！

哈哈！無驚無險，玩到五點---不過，腰骨真係好痛呀：我未試過坐兩個鐘、又兩個鐘咁長時間架。(中間有10分鐘---方便囉)

老師啲學生實在客氣，既請食午飯、又請食晚飯：淨係呢籠「波士頓龍蝦蒸糯米飯」經已夠大堆頭---未試過咁食：原來咁樣蒸呢種蝦好鮮甜，好過用上湯或者芝士/牛油焗。

晚飯時，保哥哥一直問我好多問題----響邊度學阮、學左幾耐、每星期上課時間...跟住又問我其後返屋企搭咩嘢車？

我：「附近個地鐵站從地面行到月台都好遠，而且又要轉兩次車，我寧願搭隧道巴去油麻地轉車。」

保哥哥：「一於跟我搭隧道巴啦！(跟住叫埋我師父)你都搭隧道巴啦。」奇怪，我師父又咁順攤、聽佢講嘅。

上左車，佢地兩人坐響我左右兩旁。

保哥哥：「Van，不如以後你師父上課果陣你嚟埋，等我帶住你玩阮啦，咁樣你進步會快好多，你依家練習時間太少，再多幾年都難有進步！你唱歌咁精靈，你俾啲心機學阮，一定會成功架。阿？(某師叔)就唔得啦，佢有次嚟玩、玩到震藤藤！」

我：「哦！阿？出街都會盪失路架。我驚我玩得唔好，影響你咋！」

師父加把咀：「你嚟埋係好架！因為學生交功課係學一段、唱一段，咁同一段曲你咪可以操練多次囉！上課祇得兩小時，你唔駛驚腰骨痛喎。」咁佢地亦講得有道理。此情此境，令我想起當年拜師的前塵往事：

當年我搵師父(當時係我老師)執私鐘(單對單上課)，下課後，我習慣請老師同玩洋琴/二胡嘅師伯(已離世)飲下午茶。某次佢兩人不斷游說叫我拜師；雖然拜師不久師伯便過身，但我與師公、師婆及師父一家相處十多年，真有點像家人，我相信此乃緣份。

諗諗吓：我覺得佢地今次係早有預謀囉！不過，佢地又講得啱嘅，反正我都學左幾年咯，係時候加把勁，無謂學到唔湯唔水吖！此非我個人風格。而且，保哥哥當日安排我坐響佢隔離，應該係觀察緊我，睇我得唔得啫！我估我差極都有個譜掛---我玩音樂基本上抱住敵不動、我不動心態(唔會搶先)，偶爾玩唔切嚟，我可以停下來，響啱嘅位夾番音樂，咁樣做唔會影響人。豈馬我都算係可造之材掛！(唔係老鼠架！我上課的老師都曾經咁講，祇不過我以為佢係想我上多一班、當時又冇咩嘢動力令我say yes咋)

好！新的一年，一於放多點時間玩阮，希望可以更上層樓---真係煲倒煲「老火靚湯」出嚟。

============

註：南郭先生：齊宣王愛聽竽，便號令向全國召集三百名吹竽好手為他吹竽。已召集到二百九十九名，尚缺一名時，南郭先生主動來到齊宣王面前自薦，也成為了三百名樂師之一。但其實南郭先生吹竽很難聽，為了不被別人發現，南郭先生便將豆子塞進竽裏面，不讓竽發聲。由於齊宣王喜愛聽合奏，且南郭先生又善於裝腔作勢、阿諛奉承，所以他不但一直沒有露餡，反而深得齊宣王的歡心。可惜好景不長，齊宣王駕崩，齊愍王繼位，齊愍王不喜聽合奏，而是喜歡聽樂師們一個一個的單獨吹奏。眾樂師於是推舉了先王最寵愛的南郭先生率先吹奏，南郭先生原形畢露，最後偷偷地溜走了。