反盟老點鹽蟲妖

知君無奈何

借艇望割禾

跟前講義氣

背後博你傻

日前見到鹽蟲妖都不知幾咁風騷、仲四維𠸎人講佢係幾咁受到街坊愛戴嘅。原來鹽蟲妖在上次盟主動力舉辦嘅模擬選舉之中以高票數勝出、仲話如果補打擂台委員會膽敢唔畀佢上擂台嘅話、就須要向大眾解釋喎！但細問之下才知到、原來真係有一萬多人參加投票咁大把架！坊間普遍感到疑惑、何解反盟忽然之間搞個篩選出來、究竟所為何事呢？嗱、江湖上早已有小道消息流傳、篩選是專門為自殘四子而設嘅。因為反盟內部那群大小狀師都很清楚、自殘四子根本上是不可能參賽的。因為六判嘅判詞講得很清楚、自殘四子被褫奪嘅係這一屆尊貴資格。假如這批人重返議事堂嘅話、豈不是當公堂判決倒流嘅？不大可能吧！因此心水清嘅街坊、一眼就睇出反盟咁做分明係「假道義、真抽水」收買人心嘅虛招嚟。令人感到詫異嘅係、鹽蟲妖竟然一點都察覺唔到。

呢嗱、在下在上一編網誌指出、呢四名DQ友絕無翻身機會就係咁解。政治唔止現實、而且係非常殘酷。四年時間足以令一個新丁急速竄紅、亦可以令到一個叱咤一時嘅梟雄消聲匿跡。所謂江山代代有人出、即使呢幾個人四年後捲土重來、恐怕佢哋嘅聲勢已經係明日黃花。例如痴瘋今次入獄令佢在五年內不得踏足擂台、即係話下屆垃圾擂台大賽、對痴瘋來說直程係蛋家雞見水、睇得唔飲得吖嘛！呢個情況等同判痴瘋十年八年之內都不得加入尊貴行列。咁你話嘞、佢仲有乜嘢前途？難怪有人認為佢除咗做番邦二五之外、再冇其它嘢適合畀佢做啦！嗱、人家沈酷龜就唔同、佢由花大叔一手湊大嘅、雖然被判罰銀兼守行為、但並未曾入冊、所以打擂台嘅資格並未受影響。在下早就講過、痴瘋跟酷龜嘅待遇完全係兩件事嚟。試問一個被人臨時拉夫而且只係接受一輪短暫培訓嘅痴瘋、憑啥去跟曾經接受過長期訓練嘅酷龜相比。依我睇、只有痴瘋這類自以為醒目嘅醒目仔才會踩落呢個屎氹嗰度架咋！