暗溝裡的廝殺

明刀遇暗槍

當然有死傷

去者勿回頭

黃花晚節香

呢嗱、反盟元老二馬基在篩選賽之中敗給自缺派嘅鹽蟲妖之後便淪落為後備。二馬基過不了自己面子的一關、便黯然宣布退出選舉。反盟亦馬上公布尊重二馬基退出嘅決定。殊不知、忽然有消息傳出、鹽蟲妖將不獲批准入閘。二馬基想來一招回馬槍嘅時候、方發覺原來自己條後路已被反盟封死。嗱、反盟呢招確係快準狠俱備、明知到鹽蟲妖冇機會翻閹仍然擺佢上台將二馬基氣走、然後再擺架忌冷上台參戰。然而、二馬基果然唔衰得而喊劈炮、咁咪中正反盟下懷囉！難怪街坊話、要夾錢買一個大鐵鎚和一塊大鐵砧送給二馬基享用啦！無辦法架、誰叫二馬基從政廿幾年、仍然係一焫即㷫咩？呢趟都可謂老貓燒鬚矣！

政治向來都係現實和殘酷嘅、當你有利用價值時、人人都為你抬橋。相反、連阿貓阿狗都唔睺你至係。反盟內部研究過、如果由那群上次名落孫山嘅老餅再參賽嘅話、勝算毫無把握。佢哋亦知到若以勸退為手段等同阻人發達、於是利用篩選制度來將班老鬼卡住。嗱、反盟為爭出位爾虞我詐、費盡心思去𨃩自己人。相反、有傳統紅褲子之稱嘅兩大幫會都不知幾咁有商有量、為成就大局不惜讓自己愛將跳槽過友黨去取得更高嘅贏面。嗱、千祈咪被我估中、如果守閘員忽然聲明坊間流傳與事實不符而放鹽蟲妖入閘嘅話、反盟就要大失預算、只能向二馬基借大鐵鎚和大鐵砧來齊齊晾住揼好了！有趣嘅係、反盟不知從到那裡得來的自信、肯定會全取六席。但北風吹來嘅消自顯示、包括藍營名幫派、五大家族、十三會館、以及十八寨、均收到指示凡是陽奉陰違者殺無赦。嗱、並唔係在下潑冷水、實在點睇都睇唔出反盟有乜嘢咁把炮能夠取得全勝嘅。