總公司的無奈

不動還須動

無須再耍弄

雜毛今遠去

裡外更加凶

話說、自從前事頭婆代理人執包袱返祖家刨薯仔皮之後、唐人城檔攤便交由唐人自已來打骰。點不知原歷屆阿頭來嚿嚿都係四方木、被城中大戶踢一踢就逳一逳、偏偏就只有總公司踢佢哋唔逳。究竟點解大戶咁巴閉、連總公司拍馬都追唔上、難道佢哋屁股有牙不成？無它的、勝在靠山夠大吖嘛！因為總公司稍為多聲氣、前事頭婆和花大叔就會跳出來指責總公司破壞「一家公司、兩個系統」嘅規定。這招以前真係好靈、總公司抗議總係無效架！由其是當話事人將一切事情都攬晒上身、總公司就連屁都放不出來。問你點頂？

最近坊間喉舌接二連三的踢爆地龍工程遇上「吞金滅餸」嘅忽必裂。當初阿頭一味遮遮掩掩、在事情鬧大之後、阿頭唔止沒有將件事交由咖啡專員處理、而只係蹺起雙手睇住惹事堂班友仔嚷着要成立甚麼調查委員會去跟進。殊不知、知情人士進一步踢爆造假情況不止一處、而且一鑊比一鑊甘、阿頭才意識到此事已經撳無可撳、於是下令警衛大隊長去挖它一挖、探個究竟。

呢嗱、呢單嘢不挖由自可、一挖吃一驚。當坊間滿以為豆腐渣承辦商一定係大圈佬嘅時候、兩家老外公司（隸屬前事頭婆家族嘅毒啞臘、以及其庶生兒子袋鼠仔摩下嘅蟻遁公司）出現在街坊眼前。這兩家公司曾經參與過好幾單（由大圈連接唐人城境內）大型機建工程、亦參與過城中其它大型基建項目、期間亦曾經多次出現工程延誤和嚴重超資等問題。之但係、唐人城秉承着前事頭婆用人唯親嘅傳統、往往將大型基建工程批給老外公司承辦。無論當中出現過幾多蠱惑問題都好、阿頭總是高高舉起、輕輕放下、然後又一切照舊。難怪明知到聘用老外來當警衛隊教官一定使得其隊形和風格係都跟總公司保安隊格格不相入都要咁做、原來唐人城要展示自己是與（眾）不同嘅特點。咁就明白晒點解阿頭硬係唔將那套適合唐人城嘅安全規則擺上台、不管亂成點都繼續沿用被前事頭婆改到不倫不類的也一套過期規則了！