域 流亦詩
域 流亦詩
域 流亦詩

問你點頂?

2018/06/25 13:59:55 網誌分類: 講府
25 Jun

 

揼雞不是要偷雞

就算神仙亦痴迷

拎起關刀發晒抖

未曾展翅便𨂐低

 

近日城中熱話就係、戒律長涉嫌作出選擇性檢控而惹怒了六判爺。事緣戒律長為着要煮死一名聲稱不知到有人利用其錢莊洗黑錢嘅錢莊東主、便放生一名涉嫌洗黑錢嘅阿乜姐和兩名已經在口供紙上承認有份參與洗黑錢活動嘅錢莊職員、而遭六判爺猛批評、認者不告、不認者告、畀佢玩晒喎!嗱、霎眼睇嚟、有人玩坦白從寬、抗拒從嚴遊戲、話做就做、話放就放。如果我係六判爺、見到咁情形都分唔出究竟邊個至係判官、確係唔嬲就瓦燒啦!在此之前、戒律長同樣講一聲「唔夠料告」就將所有沙嫌收受黑金嘅黃派疑犯集體放生、你話因乜解究?難怪班街坊質疑、巡捕房拉人、戒律院放人、還要用六判堂來做啥?

 

講開又講、前任戒肆長最擅長就係揼波鐘、佢將啲「畸屎」有咁慢揼咁慢、結果揼到爛尾而逃。好嘞、正當大家滿以為派來一位殺氣騰騰嘅新戒律長必會有所作為啦!係呀、在放生方面、新人確係勝過舊人架!呢位新戒律長認真駕勢、一踏入戒律院連凳都未坐暖、就以一聲「唔夠料告」便將前任戒律長一拖兩年嘅黑金「畸屎」摺埋 。之但係、當這位出手如電嘅新戒律長坐定定之後、亦呈現出選擇性揼波鐘症狀。例如去年在事頭婆公園「八狗六死」紀念日、某某社社踩線員涉嫌被乜乜社社長嚇親一案、戒肆長一直將單「畸屎」坐住、至今依然冇交代是否會提出檢控。講起嚟、確係越諗越唔明、點解我哋嘅戒律長個個都有鋪揼波鐘癮嘅?睇嚟、呢回唔係井水犯河水、而係屎水犯河水。因為個井已經變成臭氣熏天嘅儲糞池、唔知中央仲「頂得緊」幾耐呢、吓?!

 

 

回應 (0)
我要發表
user

最新回應

*KK*
*KK* 2019/09/18

兄台眼光獨到. 不出一年就有大龍鳳睇了.

"污膠藤"單野, 不知若傳到近日來港的"毒眼寒流柑"之祖家又如何呢? 若彼邦之"安胃女孩像", "神大將軍像", 甚至"安義士像"等受如此對待, 真不知此"柑"會否敢在祖家國民面前仲乜野物野囉...

多年來各大爛仔館既欺師滅祖, 以至人性夏令營等精彩場面, 真係值得透過寒流輸出至全球! 彼此認識, 促進交流呢! 世界必有新氣象, "時代革命性解放"嘛!!!

開心van仔
開心van仔 2019/09/18

你好,很久不見了!我沒有在頭條寫野也有一年了!今天突然回來看看,高興見到你呀!近月心情很沉重,太多負面新聞令人情緒低落,不知亂局何時了!

123331
123331 2018/08/22

亞域哥,「來者應,去者靜。法住無常,止心一處。」謝謝。

開心van仔
開心van仔 2018/08/22

很喜歡看你的文章,為何不寫?你今日的話令我有共鳴!我進入古稀之年,剛做了第二次通波仔手術,對世事已不再熱衷了。只希望可開心過每一天。回望過去幾十年人生,很多事都淡忘,只記開心的事,不開心的由它去!現在對很多事都淡然處之,只爭取多些時間與孫兒們相聚。

祝君身體健康,生活愉快,開心每一天!真希望可再見你的文章!