乞錢都有問題？

人家搏亂你挑剔

寸盡他人食夾攊

採訪變成大偵破

斷人衣食己無益

江湖傳聞、丐幫行乞期間假扮流料波嘅孝子、擺人家幅車頭相出來騙街坊善心。當記者找到十一袋長老常無查詢時、得到嘅答覆係「丐幫從未講過為流料波籌錢」嘅喎！記者話、街坊一直以為丐幫為流料波嘅遺孀流蝦籌措水腳助她往外地去、仲問常無對此有咩補充。常無反駁、流蝦已經被番邦包起咗啦、還有個屁必要在乞兒砵頭𢲡飯食咩！正當記者繼續追問點解要利用流料波張相來行乞時、忽然之間有個丐幫弟子跳出來話、佢哋丐幫非常之仰慕流料大俠、故此封咗佢做乞兒界嘅精神領袖、咁唔得嘅咩？記者登時口啞啞望着常無、而常無就眼矎矎咁瞪着頭頂上的一片天。

事後、丐幫副幫主噩耗酩在海報上以五毛（意思係紅家會派往輿論界嘅臥底代言人）形容追問此事嘅記者。嗱、咪以為噩耗酩亂噏廿四、兼亂扣人帽子唔使本呀！其實唔止丐幫有呢種本能、其實整個政壇都係咁架！呢種專門亂扣人冒子嘅功夫是黃偽兵從紅偽兵那裡搬過來用作打擊對手嘅撒手鐧、而且大有青出於藍而勝於藍之勢。其實、丐幫行乞手法五花八門、莫講話借流料波張車頭相出來做道具、即使斬手斬腳來呃街坊善心者亦大有人在。呢啲嘢、其實係好平常架咋！

講開又講、最近打柴四蠢招開咗一次官府打壓異己聲討大會、弊在唔曉得掛起流料波張車頭相來生招牌、結果連記者和工作人員都算埋入去、亦只係有寥寥幾十人參與、都可謂冷清得淒涼咯！講真、打柴四蠢今回弄巧反拙、日後都唔慌會獲得盟主黑金𡅏嘅支持咯！咁算唔算係陸雲霆睇相呢？嗱、這就是政治現實喇！政壇上沒有永遠朋友、亦冇永遠敵人、而只有利用價值和利益。點解講極班友仔總係唔明白嘅呢、吓？！