旅遊雜講 (4)

        阿水今次重唔乘機寸我：「咁住方面重有嘢講，有錢更係可以住好啲，自由行同旅行團都係咁。」我死撐咁答：「車！有錢實大哂架，不過有時都可以用少少付出，多多享受。」

        自由行就真係無嘢好講，俾得起錢就OK啦。但係去日本自由行，老虎蟹都要揾間係地鐵站左近，因為日本啲的士費勁貴。如果唔識路或買嘢買到腳軟，揾咗間遠酒店而局住搭的士，咁你就金啦。重有去日本自由行，點都要試吓住民宿，因為係亞洲得日本民宿至乾淨同有特色。

        有時平平地跟團都會有好酒店住，原因係旅行團有旅遊巴士接送，就可以BOOK啲市區外圍酒店，呢啲酒店好處係成本平但質數又唔錯。阿水皺晒眉咁話：「我點知我報該團啲酒店好唔好？間間旅行社都話自己俾好嘢你架啦！」我扮專家咁講：「跟團要揾啲口啤好既，你跟得團去既地方，身邊總有朋友去過，你問吓佢哋同你最終出嚟既結果通常都唔會相差好遠。不過我都有啲貼士俾到你，日本啲酒店就例排細，而旅行社講得出好住該間就多數住得過。咁返大陸就揾啲四星尾五星頭以上至好，以香港人對酒店星級既定義，大陸評級既星級酒店通通要減一粒星最起碼。而東南亞地方啲所謂星級酒店都好正路既。」

        講開酒店，有啲設計都幾騎呢。好似相中呢間咁，浴室望到房更望到出窗外，唔講你聽以為窗外有無敵大海景，但窗外係無海無河。心邪啲以為係住情侶酒店，但其他方面丁點色情嘢都無，該晚我沖近涼就諗：「如果兩個男人一齊住，個浴室又無簾，有需要入浴室做私人嘢，【肉白雙劍】咁點好呢？」