戲

連場皆爛戲

爛到你麻痺

面上掛七情

原來呃緊你

尋日、過氣縣太爺老洞公開向反派呼籲少搞對抗喎！嗱、喊反派收斂、即係叫佢哋炒花大叔魷魚。咁搞法、係咪你老洞養起佢哋呀？當年老洞以為攞「八萬五」出來益街坊實冇衰、點不知卻被班街坊迫到佢連頂烏紗都保唔住。今次佢大大聲稱讚現任縣太爺拳王井辦事能幹、仲話全城都因佢而變得和諧咗喎！家陣萬歲爺已經唔滿意拳王井將「防毒法」封印、搞到班港毒同埋班洋妓者肆無忌憚咁玩轉全城。剛剛之嘛、又被人踢爆、縣府不經公開競投便私底下以超低價租咗個物業畀外國妓者協會做俱樂部。殊不知班洋妓者將個場地用作五毒（藏毒、蒙毒、疆毒、台毒、港毒）宣揚分裂國土嘅平台。究竟邊個咁大膽私底下益班洋妓者？現在呢單嘢通咗天、真係要睇吓縣太爺點樣埋尾。

其實江湖上早就流傳、當日老洞係受人之託將拳王井推薦畀萬歲爺。拳王井當上縣太爺之後、第一件事就係將「防毒法」封印、繼而搞一趟大放生、在春節畀面派對之中又豪花三萬両銀子去餵白鴿。嗱、拳王井所做嘅事、件件都係黃者快藍者痛。今次外妓協會肆無忌憚咁明剃萬歲爺眼眉、還假作惺惺講埋大堆廢話出來「瘀」縣府一餐飽嘅。講到縣太爺能幹喇喎、啱架、對港毒和洋妓者來講、拳王井這位縣太爺委實太能幹了！之但係、佢咁做並唔見得對國家和民族有任何利益啫！你可以唔鍾意聽我咁講、但我所講嘅嘢絕對冇花假嘅。嗱、所謂政客如戲子、政壇如戲台。回望當年、仍然唔知點解、阿邊個忽然民意上錯身、在「防毒法」臨拍板之際、毅然倒戈並在老洞背後捅刀、使得「防毒法」胎死腹中。在政改一役之中、亦係唔知點解有一群人無端端等埋阿叔、而且等到手忙腳亂之際錯手置「防毒法」於死地。以上兩單畸屎都係死在架忌冷手上、你話因乜解究？別忘記、從正常角度睇、兩單畸屎皆無敗之理。假如我話、萬歲爺睇唔出箇中玄妙、你又信唔信？如果你問我、究竟本城政壇上有幾多派、我只能講僅有一派。吓、那一派？！唓、咪就係胡言一派囉！