好驚喜！食到滿漢筵席

2018/11/09 04:13:21 網誌分類: 生活

09 Nov

        　　小弟今次有幸試到由李錦記協辦及擔任醬料供應商嘅餐飲界盛事─「2018滿漢筵席重現濠江」慈善宴嘅試菜活動，真係令人難忘，尤其當「滿堂吉慶」出場時，一個錦盒揭開就係熱辣辣嘅鮑魚，鮮味到不得了！

        　　呢個即將喺11月30號至12月1號澳門銀河福臨門舉行嘅慈善宴，每席港幣20萬元，所得善款扣除成本撥捐予澳門慈善機構。又可以做善事又有得享美食，何樂而不為呢！

        兩款菜單同樣珍饈百味

        　　講返個宴會菜單，總共有兩款，一款係「鹿鳴宴」，另一款係「龍門宴」，所有菜式都係重現滿漢族菜餚特色嘅宮廷筵席，各式嘅珍饈百味不單只考廚師嘅刀工，仲對烹調手藝嘅要求極高，所以今次活動係特別邀請咗超過五十位港澳名廚一齊炮製。當中包括曾炮製國賓酒樓滿漢全席嘅林業大師、梅博大師、尹達剛大師及余英才大師參與指導，並由名廚林鎮國大師、許美德大師、陳聲大師率領一眾港澳著名中菜師傅，運用李錦記醬料炮製而成。

        　　好似「鹿鳴宴」中嘅「崑崙網鮑」同埋「龍門宴」中嘅「滿堂吉慶」，就用咗李錦記-舊庄特級蠔油將網鮑及吉品鮑燜扣至鮮、滑、香、軟，四味俱全。「龍門宴」嘅「龍船海參」，亦特別用舊庄特級蠔油配特級老抽炮製，據講如果唔用呢款蠔油就做唔返咁好味；至於「鹿鳴宴」嘅「龍鳳交輝」用咗李錦記沙律醬、麻油同白胡椒粉做成沙律醬，即時令到龍蝦同切雞味道好鮮甜，加上造型別緻，美味無窮。

        由此開始傳揚中華文化

        　　整個慈善宴由籌備至落實耗時接近兩年，單係從世界各地搜集食材已花費半年時間，製作認真。各個菜式嘅製作過程，仲會被拍攝記錄，作為日後教學用途，期望將呢個文化瑰寶傳承，並且發揚光大。就好似試菜嗰日，李錦記醬料集團香港、澳門、台灣及新加坡總裁張勐所講，李錦記一直以「發揚中華優秀飲食文化」做使命，致力推動中華飲食文化嘅傳承與創新；今年係李錦記創業130周年，搞今次嘅活動更加別具意義。

        Jacky哥