世茂集團連下兩城贊助新春國慶煙花

2019/01/22 04:12:23 網誌分類: 生活

22 Jan

         年初二新春煙花匯演，其中一幕會燃放大豬鼻煙花，Kelly想像個得意圖案就笑咗。咁得意嘅煙花，由世茂集團贊助。據小妹八卦到，世茂集團今年仲會贊助埋十‧一國慶煙花匯演，成為「雙響炮」贊助商。

         年初二煙花匯演於（二月六日）晚上八時喺維港上空綻放，歷時約二十三分鐘，一共發放二萬三千八百八十八枚煙花，分為八幕，其中加入可愛嘅「豬鼻煙花」，配以《麥兜》嘅「仲有最靚嘅豬腩肉」音樂，迎接豬年，夠晒㜺鬼！

        　　今次新春煙花匯演由世茂集團獨家贊助，並邀得香港友好協進會擔任支持機構。世茂團主席許榮茂話，希望透過贊助新春煙花匯演與民同樂，共度佳節，並為香港送上祝福。Kelly八卦到，世茂集團唔單止支持新春煙花匯演，仲會贊助埋十‧一國慶煙花匯演，以七彩繽紛嘅煙花，回饋香港，真係有心。

        Kelly Chu