機場喜訊多　三跑填海好順利透明「天際走廊」俯瞰飛機腳下駛過

2019/02/22 04:12:19 網誌分類: 生活

22 Feb

         機場管理局前晚舉辦傳媒春茗，主席蘇澤光上台拜年，公佈幾個機場發展嘅喜訊，大家拍晒手掌，機場表現真係叻叻。他透露，第三條跑道填海進展好順利，相信準時喺二○二二年啟用，之後會加建新客運大樓，到二○二四年竣工後，每年可以處理一億乘客，比現時容量多四成。佢仲介紹一條好好玩嘅「天際走廊」，有望成為旅客嘅打卡熱點。

         蘇澤光話，機場範圍正推展幾項大建設，由一號客運大樓興建一條「天際走廊」，係長二百八十米嘅行人天橋，接駁去一啲「衞星登機位」（即較偏遠嘅位置）。建成之後，乘客唔使喺一號客運大樓坐巴士去咁遠登機，方便好多。

        　　呢條「天際走廊」有七層樓咁高，用六千噸鐵製造，特別之處係有一條玻璃透明路，大家可以行上去練吓個膽，仲可以觀賞飛機喺腳下駛過，相信會成為客人嘅打卡熱點。據Kelly八卦到，機管局考慮緊開一間餐廳，大家可以一邊食嘢一邊睇美景。

        　　佢又話，機場四號停車場大樓之上，正加建幾層，用來做幼兒中心，在機場工作嘅媽咪可將小朋友送去照料，自己放工後帶回家，對員工認真周到。另外，新建的航空訓練學院至今已收過成萬學生，培訓不少航空業專門人才。

        　　講到軟件方面，蘇澤光話機場好重視高科技發展，居於國際機場前列，除了已應用嘅智能行李牌等，將在登機閘口推出人面識別系統，並廣泛採用機械人協助乘客。至於機場北的航天城，第一期三百萬方呎正興建中，包括購物、玩樂、酒店，以至體驗與醫療等。加上日後由港珠澳大橋橋頭直達機場的新橋，未來將成為旅客的遊覽熱點。機場發展前景咁亮麗，唔怪得機管局剛發行的債券，認購超額成七點五倍啦！

        Kelly Chu