悼荃灣天一

荃灣天一收檔了。

我經常病，所以也光顧過不少醫生。而市面上大部分醫生，都是傷風咳醫生－－只懂得醫傷風咳。你紅斑狼瘡？傻啦，出疹唧！你腦癌？傻啦，感冒頭痛唧！只懂醫傷風咳都算了，既然咁「專精一項」，就唔該你醫得好少少啦！傷風感冒去看醫生，開兩日藥，藥力連panadol都不如，我點解要畀錢你賺？

試過一次，用公司醫療卡去看醫生，醫生話：「頂，你早D Show出黎丫！咁我唔畀咁貴既藥你丫嘛！」事後還要我補錢，但藥效……還是那麼弱。

「給劣藥，收平價」 ，幾乎已是普遍做法。或許，從因果去看，是因為有這樣的市場，才有這樣的醫生。人們看醫生左格價右格價，呢間平d就幫襯呢間，$20睇一次，抵呀！你估去街市買菜咩師奶！！

總覺得，人們看醫生已愈來愈補習心態了。有不少中學生去補習，就是告訴（欺騙）父母和自己：「我讀左書架喇」然後心安理得去玩。「我睇左醫生架喇，D藥唔掂我都冇計架！」喂，身體係你自己的，怎能用補習心態去醫？

所以，自從去過天一，我就不再光顧其他醫生了。三日藥，而且是靚藥，收得貴少少，一般感冒都要二百幾蚊一次，但it works！況且，通常睇一次就好番晒，其他醫生實要你幫襯第二次先掂（三日藥與兩日藥的分別）。可是，「收貴D畀好藥」這模式，在荃灣這個舊區，格價師奶肆虐之下，sorry，這個模式生存不了。天一荃灣分店摺埋，唉……

這次病了，一時間不知去哪兒看病才好（又不願專誠坐車去旺角睇天一）。隨便選一家診所，有醫療卡也不用，跟醫生講明話唔介意畀貴D，最緊要用靚藥，佢口口聲聲話「放心啦，靚藥黎架」（好似街市豬肉佬既口吻），出到來，又係咁……明知我喉嚨發炎鼻腔發炎，你連消炎藥都唔畀我？有冇搞～～錯～～！！

還好，家裏存藥不少，我老婆話：「藍白色膠囊，消炎藥，每日四次，每次兩粒，飯後服，食完會眼睏……」成個護士姐姐咁款。

拿，呢D咪就係久病成醫咯！遲D配番一log藥在家，自己執藥，分分鐘慳番好多！