王憓二胡演奏會與龍華酒店跨界合作

2019/08/12 04:12:15 網誌分類: 生活

12 Aug

        　　一代二胡宗師王國潼之子王憓，係Kelly最喜歡嘅二胡演奏家，佢承傳咗父親嘅超高二胡技巧之外，仲醉心於城市二胡音樂創作。小妹聽過佢嘅作品，充滿城市人嘅情懷，聽後令人特別舒泰。如果大家想聽佢嘅二胡演奏，呢個月十六日（周五）晚上就有機會啦，佢會喺有八十多年歷史嘅沙田龍華酒店舉行「都市二胡龍華之夜」，演奏嘅曲目包括由佢創作嘅《為了愛》、《雨》、《明》、《岩首夜曲》等多首以二胡為中心嘅都市音樂。

        　　唔講唔知，原來龍華酒店主人鍾氏家族，好多成員都醉心於音樂，當晚王憓會同鍾氏兄妹合作，以二胡和弦樂作一個跨界交流。小妹好期待呢個咁特別嘅音樂會，因為仲可以食到龍華酒店著名嘅紅燒乳鴿、山水豆腐花同出色嘅私房菜。

        Kelly Chu