珍惜香港
珍惜香港
珍惜香港

2019/10/18 23:49:00 網誌分類: 寫作
18 Oct

前言 

响【地產博客】留言、發文,已經超過六年,對我嚟講,似乎積聚咗太多包袱。心大心細,總喺想揾處地方,公開之餘,又唔會太高調,可以自由發揮,唔受限於乜嘢朋友、前朋友、或網站等關係嘅顧慮。我揀呢個平台,就喺貪佢有 N 咁多個作者,作為 N 分之一,真喺想高調都難。而呢度對文章嘅內容、題材方面,都幾包容,內文格式嘅彈性,以及創作空間都幾大。我會先放上幾篇舊文,效果滿意嘅話,就會將呢度,視為發文嘅主要平台。 

珍惜香港

嚴格嚟講,【地產博客】唔算喺我寫文嘅第一個平台。我網上發文,可以追溯到 2012 香港特首選舉果年,當時就唐梁之爭,我用【珍惜】做筆名,响 i-cable 新聞下面嘅回應箱度寫嘢,但後嚟 i-cable UPGRADE 咗個回應箱,連同所有回應歷史都刪除哂。到 2012 年底,我建立咗【珍惜香港】呢個 FACEBOOK 專頁,出咗幾篇網誌,之後就集中响【地產博客】嘅回應箱度吹水,越寫越長,仲寫埋上【資深會員專欄】,前後七年光景,彷彿喺轉眼之間。 

我寫文章嘅動力,從來都喺嚟自兩個字:「感情」,尤其喺對香港嘅感情。沙士之後,香港嘅經濟,從谷底抽身,眼見我地香港人,生活漸趨穩定,但就開始唔再記得,自己嘅江山,喺點樣打返嚟,更加開始變得,憎人富貴厭人窮。以往我曾經多次提及,對救活無數港人嘅曾前前特首,香港人,食碗面,反碗底,始終會有報應,而呢個亦喺香港開始走下圾嘅重要轉捩點。結果,一個特首選舉,盡顯民心百態,僭建風波,民意逆轉。好多香港人,已經完全唔記得,佢地討厭嘅 CY,根本就喺自己揀出嚟,關乜叉小圈子選舉事。由民心衍生出嚟嘅「思歪主義」,造就咗 CY 嘅誕生,造就咗佔中,造就咗今時今日,因修訂逃犯條例引發出嚟嘅暴動。一個社會,從來都喺由市民組成,所謂,有果必有因,萬惡,皆源自民心! 

記得 2012 年底,建立【珍惜香港】呢個專頁果陣,「關於」嘅內客,我喺咁寫: 

「... 這裡所說的珍惜,和時下港人普遍的想法不同。香港的核心價值是什麼?自由?人權?法治?很多人以為我們的所謂價值被侵蝕;事實上,從來沒有人要強奪我們的什麼;失去,是因為自己不去珍惜。我們濫用了自由、濫用了人權、濫用了法治,最終會失去了這些。再者,太多香港人已忘記了,一個不受干預的自由經濟社會,加上一群自力更生、努力不懈的香港人,才是我們真正的核心價值,亦帶來了今天的成就。可惜上一代以眼前利益換去了持續發展,受寵的新一代又逐漸失去了素質,以致香港漸失競爭力 ...」 

多年以嚟,呢段內容,半隻字都冇修改過。或者簡單啲講,香港嘅核心價值,從來都只喺得呢五隻字:「獅子山精神」!我以【珍惜香港】作為筆名,就喺以呢個理念為大前提。至於果啲乜叉自由、人權、法治,講真,根本就唔算得上核心價值,因為呢啲東東,都只不過喺由核心價值,衍生出嚟嘅其他價值,如果唔喺秉承著獅子山精神去捍衛嘅話,瞬間即逝! 

眼前利益換走持續發展

正如《歸邊》一文裡面,我話,成本、價錢,固然重要,但成功,就唔可以單靠呢啲;就睇香港嘅私樓,講樓質,SHK 喺首選。作為持份者,對社會最大嘅貢獻,當然就喺做好自己嘅本業,發揚光大,持續發展。但如果只顧住低入高沽,下下賺到盡,揸乾揸殘個供應鍊,就自然會反映响自己個 OUTCOME 度,咁就算你捐幾多錢都喺假。財雄勢大果啲,就選擇息事寧人,寄望黃黑之徒,對自己網開一面;難為人地美心,呢個相對小規模嘅集團,啲舖喺咁俾人破壞,而創辦人嘅長女,依然敢言,慨嘆商界唔敢發聲 

有朋友話,如果唔喺呢場風波,都唔知道原來美心咁勁,乜叉都喺响佢旗下。當年大酒樓衰落,大可以鳴金收兵,但人地仲繼續投入本業,引入品牌,成功轉營,為飲食業界,造就幾萬個就業。如果咁都唔算獅子山精神,唔算核心價值嘅話,點先至算喺?唔通喺响獅子山上面,叉錯腳跌散咗果件「神像」? 

受寵至失去素質

印象之中,自妹仔上任特首以嚟,我都冇乜點讚過佢。不過今次,佢發表施政報告嘅表現,又真喺幾 GOOD,尤其喺時間關係,預先整定呢一招,裝你地班禽流派彈弓,等你中計叫囂兩聲就即閃,真喺寸得夠型,一洗佢之前果種弱勢。至於報告嘅內容,派錢都冇人 BUY 果啲,就不敢恭維啦!不過最亮麗果 PART,當然就喺放寬按保同壓測呢招,究竟幾有效?睇下隻毒果,叫得幾咁慘烈就知啦! 

最低工資之下,個人月入萬鬆啲,唔算太難。家庭月入三萬六,四十萬首期,買個細單位上車,月供萬四,即喺差唔多一個新界兩房嘅月租,算喺咁啦!如果你有能力,去買入門三房,家庭月入就要七萬二,首期八十萬,月供兩萬八,OK 啦!瘋乜叉狂?唔通送埋俾你?家陣啲年輕人,未經社會歷練,就俾人捧到上天,搞乜批判思維,毒壞哂個腦。佢地根本就想像唔到,我地呢班上一代,究竟喺點樣供樓,佢地左計右計,但總喺唔肯行出第一步。講真,如果未來,喺可以就咁計出嚟嘅話,就唔會叫做「未來」啦! 

記得我上車嘅年代,供樓利息要上十厘,俾息仲多過供本,一間細兩房,月供萬三蚊,但講緊喺成廿年前喎!夠瘋狂未?你地估下,我呢位年輕人嘅未來,結果喺點?基層出身,住廉租屋、攞公緩、冇父幹,死慳死抵,猛車邊上車,從打工,到創業,打過官司,之後結業,再轉營投資。原來,一個攞大半收入嚟供樓嘅年輕家庭,佢嘅「未來」,唔喺憑一部計數機,就計得到出嚟,而喺一步一步行出嚟。唔好以為有乜嘢咁特別,响我地嘅年代,呢啲 CASE 好普遍。獅子山精神、核心價值,就喺咁簡單,唔喺乜嘢「神像」! 

序之結語

本來呢篇序,只喺諗住求其做個簡單介紹就算,點知又忍唔住手。我寫文章,一向都好長篇,所以會加入一啲藍字連結,俾大家 CLICK 過去參考,以減低篇幅。講到連結,我諗有必要聲明一下,所謂,寧人負我,莫我負人,我响呢度發文,會視乎內容需要,連結去我响【地產博客】果邊嘅舊文度,但果邊寫嘅回應或文章,就唔會連結過嚟呢邊。我會守住呢個承諾,亦唔會响果邊,提及關於呢邊嘅一切。所以,冇留意開我 FACEBOOK 或其他平台嘅【地產博客】網友,會否知道我轉咗過嚟呢邊,就只能夠隨緣。 

我寫文章,好睇心情,有 MOOD 嘅,一個月出幾篇,冇 MOOD 嘅,成年都出唔到一篇。正如前言提過,呢段期間,我會先揀幾篇舊文,响呢度重 PO。我話要睇睇效果,唔喺指乜嘢瀏覽量、讀者反應之類,都喺果句,我呢份人,唔鍾意高調。我睇嘅,喺呢個網站,究竟接唔接受我嘅風格、篇幅,以及出文所用嘅技術、格式等。 

總之,一切隨緣! 

回應 (2)
我要發表
歷史長河
歷史長河 2019/10/19 09:25:41 回覆

不過最亮麗果 PART,當然就喺放寬按保同壓測呢招,究竟幾有效?睇下隻毒果,叫得幾咁慘烈就知啦!

呢招絕對係靚抽,既回應咗有真正需要,希望通過自己努力達到安居樂業,但又力有不逮一批市民,又回應咗一班希望不勞而穫、想通過攬炒達到目的的垃圾!

歷史長河
歷史長河 2019/10/19 07:57:45 回覆

沙發

user

已關注

最新回應

花姐
花姐 2020/05/16

根找不到,只能四處為家,可悲 {#iconb_225}

homan
homan 2020/05/15

父不要,母不認,畜生一只

歷史長河
歷史長河 2020/04/08

我當日聽完袁國勇的那番講話後的反應和珍兄差不多,覺得有些莫名其妙。我甚至問當時身邊的人什麼是帶抗體者?難道不是中過肺炎的患者嗎?那為什麼中招者少代表疫情嚴重?

愚公
愚公 2020/04/06

甚麽人或外力使香港的獅子山精神变了本土主義??英國要放棄会生金旦的鹅??!!美國又不欲中國壯大??!!各國又怕一國兩制开左好的頭,自己國內会有人有樣学樣要求??!!於是外國不停吹嘘拆台,話你中國一定做不好一國兩制,其實最守信,守承諾就是中國!!