KellyChu - 田徑吳艷妮 蝶后張雨霏 水球熊敦瀚 國家隊女將美貌與實力非凡成焦點｜Executive日記

熱烈開展緊嘅杭州亞運，除咗各項比賽緊張刺激，國家隊唔少女運動員樣貌與實力兼備，同樣係焦點所在，今日小妹就同大家介紹下！

亞運開幕、中國隊出場嗰陣，一位運動員笑容甜美，面對鏡頭仲好機警，即刻揮舞國旗，當眾起跳「比心」，瞬間成為焦點。佢就係有「田徑女神」之稱嘅吳艷妮，雖然年僅26歲，不過實力非凡，早喺8月嘅成都世大運嘅女子100米欄，以12.76秒成績奪得銀牌，更係今年亞運同一項目嘅奪金大熱！

喺上周日嘅女子200米蝶泳決賽，25歲嘅「蝶后」張雨霏就以2分05秒57，打破亞運紀錄成功衛冕，為中國泳隊摘得賽事首金。張雨霏外表可愛清純，平時鍾意紮一個「哪吒頭」，同隊友有講有笑，不過對比賽就十分嚴格同自信。早喺賽前，佢就為定下目標：拿下7金，成為「最有價值運動員」，仲強調「只要我游出自己的成績，就沒人贏得了我。」

同樣仙氣逼人嘅，係24歲嘅「水球女神」熊敦瀚。佢喺開幕式同樣大受網民關注，周一就同女子水球隊員，以33：5大勝烏茲別克。

Kelly Chu