KellyChu - 粉絲排長龍最後嚐味發哥係熟客 48年豪華餅店結業｜Executive日記

2022/09/19 04:11:59 網誌分類: 生活

19 Sep

繼灣仔嘅快樂餅店結業，好快我哋又要同另一間傳統港式餅店講byebye。位於九龍城嘅豪華餅店宣佈喺十月一號結業。昨日，Kelly去見呢間港式餅店嘅最後一面啦，一去到就見到紅底白字嘅招牌下大排長龍。Kelly最後買咗個酥皮蛋撻，真係好有香港嘅味道。

除咗小妹同九龍城街坊之外，另一個聽到消息會傷心嘅肯定係發哥周潤發喇。餅店員工昨日仲話，發哥未知消息。餅店老闆周先生同埋周太曾經喺傳媒訪問中提到，發哥喺七九年幫襯過之後，就經常嚟餅店，仲試過喺客人多嘅時侯，幫手賣包。

老闆娘又講，發哥肚餓嘅時侯，最鍾意自己攞件合桃蛋糕，企喺舖頭「堂食」。

開業四十八年嘅豪華餅店多款馳名糕餅入面，發哥必吃嘅就係酥皮蛋撻、合桃蛋糕，而發嫂至愛呢，就係菠蘿包同雞尾包。不過，Kelly聽講提子包、花卷亦出名好食㗎！
Kelly Chu