KellyChu - 致電港台玩遊戲 聽錯問題 婆婆rap「蔬菜組合名」勁搞笑｜Executive日記
2023/04/15 03:17:54
網誌分類:
生活
主持人「破功」笑咗
港台節目《香江暖流》有一個環節叫「極速15秒」，觀眾可以Phone-in玩遊戲，15秒內答到最多答案嘅人就勝出獲獎。觀眾林婆婆同節目連線後，節目主持鄧添樂字正腔圓咁叫婆婆讀出「歌唱組合名稱」，不過婆婆好似聽錯係「蔬菜組合名稱」，一直問：「係咪菜啊？」雖然主持多次重複：「唔係菜啊，唔係菜啊，聽清楚先，問題係歌唱組合名稱。」但婆婆太興奮，不斷狂rap：「菜心、白菜、芥菜、茼蒿菜、菠菜、生菜……」見阻擋唔到婆婆嘅熱情，主持只可以聽佢rap足15秒，最後仲忍唔住「破功」笑咗，但不忘安慰話：「唔緊要，志在參與吖嘛。」
片段引起全城熱議，港鐵仲好幽默咁喺FB發文話：「記得聽清楚問題先！請喺15秒內，講出附近買到菜嘅車站名～無論係生菜、白菜、芥菜、西洋菜、茼蒿菜、菠菜、定係菜心都得！再重複多次，題目係附近買到菜嘅車站名！」
言語治療師、TVB前新聞主播梁凱寧就分析婆婆點解搞錯：「首先粵語音節係由聲母、韻母、聲調組成歌唱（go1 coeng3）同蔬菜（so1 coi3），兩對詞語聲調都係1、3同埋1、3。聲母方面，唱同菜都係『c』，韻母方面，歌同蔬都係『o』，呢啲共通點加埋起上嚟，就容易令婆婆混淆啦。」
Kelly Chu
■梁凱寧分析婆婆搞錯問題的因由。
■有婆婆就致電電台玩遊戲，原本主持人問佢「歌唱組合名」，點知變咗狂rap「蔬菜組合名」。
回應
(0)
我要發表