KellyChu - 13年前小學辯論賽妙語短片突翻紅 「你哋係咪嬲我呀？」女辯手成律師｜Executive日記

　　最近一段13年前嘅小學辯論比賽片段被網民瘋傳重溫，其中一名女生喺辯論期間問對手：「你哋係咪嬲我呀？」，令網民O嘴兼爆笑，Kelly睇完都覺得同學仔好可愛，而認識呢位可愛女生嘅老師就透露，佢𠵱家已經成為一名律師喇！

　　影片源自2011年油蔴地天主教小學（海泓道）與協恩中學附屬小學嘅辯論對決，當時辯題係「香港兒童真幸福」，正方係油天，反方係協恩。正方男同學當時講到，佢哋喺12隊參賽隊伍中，成功入到冠軍賽，代表佢哋係頭6分1，都幾犀利，再睇返香港無論生理或心理方面，都係排全球頭6分1，反問「點解今日我哋唔算係幸福呀？」

　　協恩女生反駁：「友方同學，我哋辯論比較叻等唔等同我哋幸福呀？」，女生見對方冇反應就繼續話：「友方同學，我答完你到你答我喇喎」，然後突然降低語速及聲量問：「你哋係咪嬲我呀？」令油天同學仔尷尬又爆笑。

　　教過呢位女生嘅老師透露，女生𠵱家已經成為一名律師，作風低調，相信對片段翻hit都感到驚奇。影片上載者亦指該名男同學長大後都係讀法律。似乎兩位同學仔嘅辯才自細便養成了。

KellyChu