KellyChu - 見死必救真英雄 釣魚郎衝浪男勇救翻艇漢｜Executive日記

日常中見偉大，今日小妹就同大家分享一件暖心嘅好人好事！珀麗灣碼頭上個星期日有一個60歲男子遇溺，佢划獨木舟唔小心翻艇，雖然成功游岸邊，但之後又游出海執拾失物，懷疑體力不繼遇溺。但好彩，喺附近釣魚同衝浪嘅兩名男子見到，二話不說合力將佢救起。救人片段曝光後，網民大讚：「真英雄」、「向所有救人英雄致敬」！

片段可見（見圖），事主遇溺後，面部朝下喺水面漂浮。經過嘅釣魚男子多次高呼「老友、老友」，見對方毫無反應，於是親自下水，將佢拉上獨木舟，並驚喜大叫：「仲有氣呀，仲有氣」；由於無法獨力帶他上岸，釣魚男子又向四周呼叫：「救命呀、救命呀！」正在衝浪嘅男子聽到，馬上趕到，合力將事主救上沙灘，並報警求助。最後消防趕到急救，並安排直升機送院救治。真係好險，小妹都向呢兩位無名英雄致敬！

Kelly Chu