KellyChu - 籌善款幫助乏家庭照顧兒童 着便服行善 齊撐公益金30周年盛事｜Executive日記

今年公益金便服日會喺10月30日（一）舉行，Kelly以前讀書時好期待便服日，因為可以着自己鍾意嘅便服返學，但其實便服日仲有一層更深意義，今年活動所籌得嘅所有善款，都會用嚟幫助缺乏家庭照顧嘅兒童，同埋提升及加強社會對保護兒童意識，所以小妹都鼓勵大家今年繼續踴躍參加。

適逢今年係公益金便服日30周年，公益金表示，希望社會各界能夠一齊見證呢個重要里程，無論係上班一族定係學生，都希望大家以微小嘅善行，將愛心傳遞出去，為有需要人士出一分力。

參加者只需要捐款港幣70元或以上（學生不設最低捐款額），就可以喺便服日當天穿上鍾意嘅便服上班或上學。捐款港幣200元或以上，更可以獲贈便服日30周年限量版手機背帶乙份。手機背帶有本地插畫師cheeky cheeky厚面子充滿童真及活力嘅設計，傳遞滿滿正能量。

小妹從大會方面得悉，活動籌得嘅善款唔會扣除任何行政開支，全數資助提供「兒童保護及福利服務」之公益金會員機構，向缺乏家庭照顧嘅兒童提供援助，並提高公眾對防止虐待兒童嘅認識，為兒童提供健康成長環境，令佢哋得到全面發展。即刻瀏覽公益金便服日網頁了解活動詳情啦：commchest.org/event/dcd2023。

Kelly Chu