KellyChu - 港式紅豆冰、楊枝甘露口味 旅發局「飲『吧』」推創意雞尾酒｜Executive日記

繼舉辦年度盛事Wine&Dine之後，旅發局再聯同全城近400間餐廳及酒吧，喺今個月提供佳釀美饌驚喜，其中將以「香港」為主題，推出多達60款期間限定雞尾酒，包括加入咗港式糖水嘅「童年回憶——紅豆冰」、「地道特色——楊枝甘露」等。小妹認為創意十足，一於盡情逛「吧」！

旅發局邀請全港60間特色酒吧，為市民旅客打造驚喜餐飲體驗，推出全新節目「飲『吧』！香港」，包括入圍「亞洲50 最佳酒吧」嘅Argo、The Aubrey及Mostly Harmless都會參與。用港幣280元選購包含8個代幣嘅套票，就可以優惠價錢品嘗參與酒吧嘅招牌雞尾酒，串遊中環、灣仔、銅鑼灣、尖沙咀、西九龍等多間吧。

60款期間限定、以「香港」為創作概念嘅「香港靈感雞尾酒」之中，小妹推介品嘗選用港式糖水及地道食材創作嘅款式，包括配上琴酒及栗子酒嘅「童年回憶——紅豆冰」，以及入口清甜濃滑嘅「地道特色——楊枝甘露」等，創意十足，非常Hong Kong。

此外，旅發局亦聯同城中超過250間人氣餐廳合力推出「品味香港」(Chill E.A.T)，提供高達7折嘅精選套餐優惠，當中包括享有盛譽嘅米芝蓮猛將及由星級主廚掌舵嘅餐廳等，由本地美食到環球美饌，以及新派可持續餐饗等應有盡有。

Kelly Chu