KellyChu - 10元1張即影即有相 捐錢助病童圓夢 昂坪市集聖誕樹打卡做善事｜Executive日記

下個月就到聖誕，係時候諗定去邊到玩喇！昂坪360就首度聯乘著名即影即有品牌Polaroid寶麗來，11月18日至明年1月1日，喺昂坪市集舉行「昂坪360xPolaroid 冬日炫彩聖誕」，屆時會有一棵7米高嘅寶麗來彩虹色調嘅聖誕樹畀大家影相打卡；而只要花10元，喺樹前影寶麗來即影即有相片一張，昂坪360就會將收益捐畀「願望成真基金」。過快樂聖誕之餘，仲可以做好事，Kelly梗係到場支持，希望到時見到大家！

昂坪360特意設計約7米高、寶麗來彩虹色調嘅聖誕樹，加上Y2K年代復古風格嘅拍照打卡點，帶賓客走進時光隧道，回到過去，走入卡拉OK、保齡球場、滾軸溜冰嘅經典場景，影相打卡之餘，重溫昔日青蔥歲月！而每逢周末及公眾假期，大家只要喺7米高嘅彩虹聖誕樹前，用10元拍攝寶麗來即影即有相片一張，昂坪360就會將所有拍攝收益捐畀「願望成真基金」，幫助病童實現願望。

另外，昂坪市集到時亦特設寶麗來相機展覽同聖誕攤位遊戲，等大家過一個Merry Christmas！

Kelly Chu