KellyChu - 光棍節就到喇 逾7成男女同網友傾3.2小時就約出街｜Executive日記

話說一年一度嘅11月11日光棍節就快到，其實唔少男女都好恨拍拖，希望搣甩「光棍頭銜」。有約會交友App調查發現，高達77%、27至33歲嘅單身男女覺得，光棍節呢日淨行街購物唔夠，最重要係有個人「約會」陪下；佢哋會主動喺網上同人傾計，平均傾3.2小時，就會約網友出街見面；而其中從事科技、航空業嘅人士赴約意願最高！小妹先祝願大家脫單成功，不過其實感情唔可以急，大家都要有耐性搵到啱嘅人！

另外，調查亦發現，生得靚嘅男女單身機率反而更高，除咗刻板印象覺得佢哋一定有另一半，仲有受訪者透露，唔少人覺得佢生得太靚，相處嗰陣沒安全感，因而分手。原來有時候「美麗有罪」，靚都係一種負擔！

Kelly Chu