KellyChu - 12‧16互動藝術裝置登場 大華銀行再夥故宮館辦水墨藝術節｜Executive日記

文青Kelly近年好迷水墨藝術，驚喜發現大華銀行「藝‧坊」同香港故宮文化博物館再度合作，本月16日起舉辦水墨藝術節，屆時除咗可以睇到水墨藝術展，仲可以體驗互動藝術裝置。小妹已經Mark好日期入場喇！

今次水墨藝術節12月16日至31日喺香港故宮文化博物館故宮學堂舉行，入場費全免，而且節目豐富，包括「2023年大華銀行年度水墨藝術大獎」得獎作品展、互動水墨藝術體驗、沉浸式水墨動畫投影、專題講座及座談會、期間限定音樂表演、水墨藝術工作坊、探訪藝術家工作室等。

「2023年大華銀行年度水墨藝術大獎」得獎展覽涵蓋抽象以至山水風景，創作技法多元，展現豐富深遠嘅意境。觀眾可以喺「墨影劇場」欣賞沉浸式水墨動畫投影；屆時現場亦會展出香港新媒體藝術家張瀚謙（h0nh1m）創作嘅新媒體互動藝術裝置《湫漻冊》，呢個係張氏創作嘅《書》系列三部曲嘅最後一部曲。《湫漻冊》係一本記載清靜無聲之書，以恍似墨嘅水滴痕跡組成，觀眾可以輸入文字內容，內容會再轉化成摩斯密碼呈現。

大華銀行大中華區行政總裁兼集團傳播及品牌策略管理部主管葉楊詩明表示，今次合作除咗展示中國水墨藝術嘅博大精深，更重要係培育下一代藝術人才；香港故宮文化博物館館長吳志華就話，今次藝術節令公眾欣賞到中國傳統水墨嘅藝術精髓。

Kelly Chu