KellyChu - 旅社推「東莞深圳山姆團」 食玩掃貨一條龍｜Executive日記

最近Kelly身邊好多朋友都話，深圳山姆超市又便又正，有人仲幾乎每個周末都北上掃貨。不過，原來組團去都得！有旅行社下月就會推出「東莞深圳山姆團」，兩日一夜嘅行程，除咗會去東莞松山湖睇落羽杉、遊有「嶺南小麗江」之稱嘅西溪古村，仲包住宿同三餐自助餐，而尾站就係重頭戲：去深圳山姆超市掃貨。每2位團友仲可獲贈一張山姆一年會籍會員卡。而團費性價比都好高，每人最低只要429元！

東瀛遊執行董事禤國全就同小妹透露，東瀛遊嘅山姆團已經預留2個鐘以上購物時間，又笑住話推出之後反應熱烈：「如果反應咁好，唔排除會繼續搞，方便市民北上辦年貨！」

Kelly Chu