KellyChu - 女子個人形7125分 力壓日本勁敵 劉慕裳成首位「世一」空手道港將｜Executive日記

體壇昨日再傳喜訊，香港空手道代表劉慕裳（Grace）首次登上女子空手道個人形世界排名第一。Grace話好高興可以喺2024年嘅開始向大家宣布呢個消息，亦多謝團隊、朋友同家人嘅支持，今次嘅成功提醒佢要繼續努力突破及相信自己！Kelly都為Grace感到開心。

喺世界空手道聯會（WKF）最新公布嘅世界排名中，Grace以7125分首度升上女子個人形項目榜首，以60分之差力壓日本勁敵大野光，並且拋離4515分嘅日本宿敵清水希容，另一位日本女將大內美里沙則以4007.5分排在第4位。

Grace係第一位得到呢個成就嘅港將，佢去年狀態大勇，可謂實至名歸，包括去年7月喺亞洲錦標賽擊敗清水希容，首次勇奪金牌，創下空手道港隊嘅亞洲首金紀錄，10月再於杭州亞運項目奪得一面銅牌，之後更闖入世界錦標賽決賽，雖然最終以1分之差不敵大野光，但收穫銀牌並創下港隊歷來最佳成績。

楊潤雄祝賀：寫下輝煌新一頁

文化體育及旅遊局局長楊潤雄祝賀劉慕裳首登「世一」，形容為本港空手道寫下輝煌新一頁，香港再次培養出世界第一嘅運動人才，令人振奮，為劉慕裳一直努力不懈感到驕傲。

Kelly期望2024年香港運動員繼續勇闖高峰，帶來更多好消息！

Kelly Chu