KellyChu - 昂坪360業績回勇 訪客人數追平疫前｜Executive日記

通關後，大家都好關心各景點生意有無起色，Kelly就打聽到，昂坪360交到一張唔錯嘅成績表，尤其喺舊年第4季，已經大致追平疫情前嘅訪客數目！舊年全年嚟講，以本地旅客支持為主嘅纜車全年通銷售數字，亦比疫情前增加咗29%，都咪話唔犀利！

仲記得上年年尾，見到昂坪360喺尹光演唱會之後，即刻邀請到佢出席活動、飲到頭啖湯，都覺得佢哋反應快。喺搵到光B加持嘅同時，昂坪360亦同著名相機品牌寶麗來合作搞聖誕推廣，令聖誕期間嘅昂坪充滿咗Y2K味道。另外仲同叱咤頒獎禮合作，喺昂坪又搞記者會，請到約170個當紅歌手出席，又搞叱咤打氣館，吸引咗唔少樂迷特登上山支持。

昂坪360上年做咗咁多有聲有色嘅市場推廣活動，唔怪知得吸引到咁多本地同海外賓客到訪。據Kelly所知，佢哋嘅市場推廣團隊喺舊年仲囊括咗66項海內外獎項，似乎係真正嘅「攞獎攞到手軟」！

農曆新年期間，唔少人鍾意登高行返個大運，昂坪360亦預計佢哋喺嚟段時間人流會大增，按年增幅更有機會達到雙位數，所以一早安排咗人手，將初一至初四嘅營運時間，延長至朝早九點至夜晚八點，方便大家！

Kelly Chu