KellyChu - 守門員後腳踢波入自己龍門 小學足球賽避強隊走線疑「打假波」｜Executive日記

最近內地追看央視嘅國足反腐片，但原來本港小學生細細個就學識「打假波」？全港小學區際五人足球賽日前舉行，不過網上就熱傳片段，可見葵涌對屯門嗰陣，兩隊疑為咗避開強隊元朗區，走線「打假波」，期間有守門員疑將波射入自己龍門。雖然香港足總話懷疑有人教唆，已經約談教練；但有網民就半開玩笑半認真咁建議，呢班足球小將要「每日罰睇番（前國足總教練）李鐵（反腐片）兩次」！

呢場比賽喺本月13日舉行，片段可見，身穿白衣嘅葵涌球員回傳畀守門員，不過守門員疑後腳將波踢入自己龍門，之後個樣完全沒驚訝或自責。片段又配上字幕，話因為首名出線要對元朗，屯門同葵涌都唔想贏，形容有守門員將波直接扔入自己龍門。

最終，屯門以5比3擊敗葵涌；進入淘汰賽後，元朗就以4比0勝屯門；次名出線嘅葵涌，就以1比1賽和港島西，最後在點球大戰，葵涌2比3落敗出局。

香港足總話，懷疑有人教唆或鼓勵球員不誠實作賽，已展開調查，強調好重視教練同球員操守，正擬備德育教材引入青少年足球培訓課程，從小培養球員有正確價值觀。據悉，中國香港學界體育聯會亦已要求涉事裁判同教練，就有關賽事交報告。

Kelly Chu