KellyChu - 立會搞「惜食體驗日」 議員親嘗剩食烹煮飯盒｜Executive日記

近日社會對垃圾徵費措施有好多討論，立法會噚日就聯同「惜食堂」舉辦咗「惜食體驗日」，鼓勵市民從源頭減少廚餘，食得唔好嘥。立法會主席梁君彥話，立法會十分認同「惜食」理念，已指示秘書處盡快購買智能廚餘回收機。

梁君彥表示，今次活動有議員、助理及秘書處職員共250人參與，反應踴躍，捐款不斷上升，希望各界身體力行，支持惜食堂嘅工作，佢又感謝為活動穿針引線嘅經民聯議員陳祖恆。

陳祖恆透露，去年12月同太太參與了惜食堂嘅活動，覺得可以帶到立法會畀各位議員感受，形容惜食堂以剩食烹煮嘅飯盒符合均衡飲食，多菜少肉，質素同普遍飯盒一樣，仲話一定好味過飛機餐。

惜食堂係本港非牟利機構，向本地飲食界回收可食用之剩餘食物，再經廚房烹煮成營養均衡嘅膳食，由物流團隊免費派畀有需要食物援助嘅人。

Kelly Chu