KellyChu - 勤於透過不同媒體平台 講解房署計劃 羅淑佩YouTube節目解讀房策｜Executive日記

好嘅政策要配合好嘅宣傳，房屋局常任秘書長、房屋署署長羅淑佩（Rosanna）與傳媒關係良好，透過傳媒同市民講解房屋政策。Rosanna除咗接受各大報章、電台、電視訪問，近日仲出席社交平台YouTube嘅時政節目「圍爐」，同觀塘區議員柯創盛傾下房署打擊濫用公屋等問題。小妹睇完，即刻畀咗個Like！

節目1月24日起一連3日播出，喺第一節訪問，羅淑佩同柯創盛講到目前濫用公屋嘅情況，強調房署打擊濫用公屋，並唔係「仇富」嘅表現；而喺第二節訪問，Rosanna就細數房委會喺幾個關鍵年份所推出嘅唔同計劃，點提升港人嘅生活幸福感。

喺昨日播出嘅第三節訪問，Rosanna就討論房署點樣利用物聯網（Internet of Things）同人工智能（AI），建構「智慧屋邨」，又講解「共築．幸福」計劃嘅主旨，點提升居民嘅幸福感。Rosanna話，依家房屋局、房委會及房署會落區了解屋邨邨民需要，可能涉及嘅只係小事，但希望透過小改善，例如每層樓嘅大堂有位置畀長者扶靠或坐低等，令居民獲得多啲幸福感。

Kelly Chu