KellyChu - 縱橫報界30年 拍內地難民照成名 首代華人攝記「橋叔」逝世 鏡頭留下歷史｜Executive日記

本港著名第一代華人攝影記者陳橋，喺溫哥華時間4月6日中午離世，享耆壽96歲。陳橋被行內尊稱為「橋叔」，喺佢長達30年嘅攝記職涯中，曾用相機記錄無數歷史畫面，無論內地難民逃港、六七暴動以至市民生活大小事，佢都認真捕捉真實、動人嘅時刻，令讀者今天仍可從其作品中細味當年。

　　橋叔少年時曾跟隨母親喺正街賣魚維生，後來經姑丈介紹下，去咗虎豹別墅幫遊客影相，第一次接觸同攝影有關嘅工作，之後又到《英文虎報》做黑房沖曬員，從此展開成為攝記嘅路程。

　　1959年，佢轉職《南華早報》，隨後遇上多宗大新聞，包括60年代初內地難民因饑荒逃到香港，橋叔喺邊鏡山頭拍下多張感人照片，其中一張婦人大哭嘅相，成為「逃港潮」經典畫面，部分作品現時更陳列於香港新聞博覽館。橋叔另外一張最為經典嘅相片攝於1961年7月，當時佢影到一名英國士兵跟香港女友依依不捨道別，二人後來共諧連理並定居香港，1979年更專程帶同子女，前往參觀橋叔嘅攝影展。

　　橋叔生前憶述，令佢最印象深刻嘅一次攝影經歷係六七暴動，當時佢到東頭邨拍攝暴徒與警方對峙，結果遭到十幾個人圍毆，打傷胸骨，好在有一名左派銀行職員趕到救援，才能保住性命。

KellyChu