KellyChu - 唔夠1日逾1.2萬人參加小紅書活動 華晨宇香港開唱 旅發局抽飛狂吸粉 | Executive日記

　　中國創作歌手華晨宇本周24至26日，將於中環海濱活動空間舉行為期3天演唱會。被譽為「舞台王者」嘅佢吸like超驚人，唔單止五一期間嘅煙台演唱會門票瞬間售罄，旅發局就今次香港站演唱會推出嘅限時門票抽獎活動，喺小紅書推出不足一日，已經有超過1萬人參加！

　　華晨宇五一期間於山東煙台養馬島音樂營地舉行「火星樂園」，當時門票瞬間售罄，3日共錄得13萬觀眾入場，演唱會場地周邊民宿亦被一搶而空。有內媒估計，該場演唱會為煙台帶來約1.6億嘅經濟效益。

　　旅發局多次透過小紅書宣傳華晨宇香港站演唱會，臨近演唱會更推出「出行攻略」，向粉絲提供一站式出入境及交通資訊，有關華晨宇嘅帖文均獲逾千人讚好。

　　旅發局乘勢加緊宣傳，周一推出限時抽獎活動請睇演唱會，小紅書用戶於周一至周四期間參加抽獎，即有機會獲2張價值1060元嘅門票。活動推出唔夠一日，已經有1.2萬人參加抽獎，更有超過4500個like、逾2500個回應，反應非常熱烈。

　　至於天文台預料24至26日會下雨，旅發局就喺抽獎活動文案指︰「我想，我們沒必要煩惱會不會被大雨淋濕，人生予一切無常，有風聽風，有雨看雨，就讓一切都順其自然地發生吧。這次我們可以在維港欣賞日落，也可以在雨中感受肆意灑脫的自由。」

KellyChu