KellyChu - 價值連城 散發童真歡樂 The Henderson展出Jeff Koons紅氣球天鵝 | Executive日記

        恒基地產旗下中環商業項目The Henderson，由舉世知名嘅扎哈‧哈迪德建築事務所（Zaha Hadid Architects）設計，糅合藝術、創新同可持續發展元素。隨住大廈迎來首批租客進駐，恒基亦宣布，會將呢種藝術建築美學延伸至室內，為The Henderson引入美國藝術家傑夫．昆斯（Jeff Koons）嘅作品「氣球天鵝（紅色）」。文青小妹知道，Jeff Koons嘅藝術充滿童真同歡樂，好羨慕嗰度嘅上班一族，可以隨時感受呢種幸福！
　　Jeff Koons被譽為當代嘅「普普藝術之王」，佢嘅作品以極其單調嘅物料，配上奪目嘅色彩堆砌聞名。Jeff Koons喺2004年至2011年間，製造出5個顏色系列氣球天鵝作品，包括紅色、紫紅色、紫色、藍色和黃色。呢啲氣球天鵝用不鏽鋼製成，拋光成鏡面，光亮嘅鏡面可以反映人影，等觀賞者與藝術品結合，拉近兩者距離。

　　今次The Henderson引入嘅「氣球天鵝（紅色）」，約3米高，重逾3公噸，喺自巴黎高古軒畫廊首度亮相後，首次喺亞洲展出，將會放置喺The Henderson三樓大堂，等租戶同上班一族，每日都可以感受到藝術氛圍。值得一提係，Jeff Koons嘅作品喺全球拍賣市場一直大受歡迎，例如氣球狗（橙色），喺2013年就以5840萬美元（約4.56億港幣）拍出，創下當年世界藝術家藝術品最高價。

　　另外，The Henderson亦會打造全亞洲首個扎哈‧哈迪德雕塑公園，工程完成後，會引入藝術裝置，提供休憩綠化空間。

KellyChu