KellyChu - 政府吉祥物友誼賽撐奧運 楊潤雄劉震劉明光化身啦啦隊 | Executive日記

　　2024巴黎奧運仲有3日就正式開幕，文體旅局亦積極投入熾熱奧運氣氛，舉辦咗一場4 X 100友誼接力賽，政府各部門共派出️8位重量級「健兒」參賽，全力宣傳奧運與殘奧，仲邀請到3位官員化身啦啦隊添！

　　文體旅局昨日喺facebook發布片段，片中有8位「健兒」分兩隊比賽，A隊成員包括文化擔當「思文喵」、救援擔當「任何仁」、節約擔當「滴惜仔」及清潔擔當「清潔龍阿德」。B隊成員有體育擔當「活力仔」、防騙擔當「提子」、環保擔當「大嘥鬼」、防洪擔當「下水水」。

　　文體旅局派出3位官員化身啦啦隊，包括局長楊潤雄、副局長劉震及康文署署長劉明光，出席比賽為8位「健兒」打氣。Kelly好想知道邊隊贏，唔知局方會唔會下回分解呢？

KellyChu