KellyChu - 中國朋友父親翻譯名字 賀錦麗中文名解「才貌雙全」 | Executive日記

美國總統拜登宣布退選後，全力支持副總統賀錦麗代表民主黨參選競逐下屆總統。賀錦麗雖然沒有太多亮麗政績，但佢本人嘅性別同種族背景就令佢獲得多個第一，包括美國第一位女副總統及第一位亞非裔副總統。賀錦麗呢個名聽落亦似中國人名，令Kelly覺得好親切，翻查資料，原來係賀錦麗專登搵朋友仔改㗎。

　　賀錦麗原名係Kamala Harris，直譯成中文應該叫卡瑪拉·哈里斯，點解會變咗個咁似中國人嘅名呢？原因係賀錦麗喺2003年競選三藩市地方檢察長時，邀請咗認識多年嘅政府律師蘇榮麗，請佢爸爸蘇錫芬幫忙改個中文名，以藉此拉近與當地華人嘅連繫。

　　據悉蘇錫芬生前係加州華僑領袖，為駐美中華總會館嘅活躍成員。蘇先生取Harris諧音作姓氏「賀」，「錦」則係祝福其前程似錦，「麗」指才貌雙全。賀錦麗一開始並唔太喜歡「麗」字，比起美貌，佢更希望以智慧取勝。蘇先生解釋按華人傳統，「姊妹」必須有個字係相同，因為蘇榮麗個名有個「麗」字，所以佢就接受咗賀錦麗呢個中文名。

　　賀錦麗老公Douglas Emhoff都有個中文名叫做任德龍，同樣都係由蘇先生所取，大部分外國男人都鍾情「龍」字，所以呢個字係老公自己主動要求加落個名度嘅。賀錦麗將近50歲先遇上現任老公，但兩人非常恩愛，任德龍更喺賀錦麗競選副總統期間暫停律師工作，陪佢奔走各州向選民拉票。

KellyChu