KellyChu - 胡英明預告請飲咖啡 廉署拍片9實習生「真人騷」前傳 | Executive日記

廉政公署（ICAC）出片介紹參加今年暑期實習嘅同學仔，據悉9位實習生自7月初起，就喺ICAC展開為期6個星期嘅實習，稍後仲會有真人騷釋出，Kelly好期待呀。佢哋喺片中被問到要喺兩杯飲品二揀一，都不約而同揀咗飲咖啡，不過廉政專員胡英明就打趣話：「想我請你飲咖啡？過咗ICAC嘅暑期實習先再講啦！」

　　ICAC噚日喺官方Facebook發布題為「廉政行動，有志者前傳」嘅一段短片，同學仔喺廉署不同角落回應旁白者提問：奶茶定咖啡？檸茶定係Macchiato？珍珠奶茶定係Cappuccino？檸檬茶定係Affogato？芒果沙冰定係Latte？大家都不約而同揀咗咖啡。

　　胡英明就喺片尾驚喜亮相，仲自斟自飲廉署咖啡講道：「想我請你飲咖啡？過咗ICAC嘅暑期實習先再講啦！」

　　各位實習生雖然都係香港兒女，但就讀海內外不同大學，包括香港大學、中文大學、城市大學、北京外國語大學、倫敦瑪麗女王大學及利物浦大學，正修讀法律、計量金融、工商管理、計算機科學及英文學士課程。

　　佢哋自7月初起就喺廉署展開為期6個星期嘅實習生涯，分別派駐執行處（香港國際廉政學院、電腦/資訊科技組）和廉署社區關係處（香港商業道德發展中心、宣傳創作組、傳訊及傳媒事務組）實習。

　　廉署小編就用hashtag半劇透，寫下「都係咖啡」、「反貪意志」、「intern」、「真人騷」等字眼，仲喺片尾打出「待續」兩字。如果網民想了解同學仔嘅實習點滴，可留意稍後推出嘅「intern真人騷」！

KellyChu